د لوړو زده کړو سرپرست وزیر د مرحوم امیرالمؤمنین ملا محمد عمر مجاهد رحمه الله په اړه جوړ شوي سمینار کې ګډون او وینا وکړه
د کابل پوهنتون له لوري په جوړ شوي یو ورځني سمینار کې د لوړو زده کړو سرپرست وزیر محترم شیخ الحدیث مولوي نداء محمد ندیم د اسلامي امارت د بنسټ اېښودونکي او محبوب زعیم امیرالمؤمنین ملا محمد عمر مجاهد رحمه الله ژوند، کارنامو، تقواء او خاکسارۍ په اړه محصلینو ته مفصلي خبرې وکړې.
محترم شیخ صاحب وویل چې محبوب زعیم امیرالمؤمنین ملا محمد عمر مجاهد رحمه الله داسې شخصیت و، چې اوس هم د نړۍ سیاست پوهان، پاچاهان او عالمان ورته ګوته په غاښ دي او د ده مبارک د ژوند، کړنو او پرمختګونو په اړه لا هم څېړنې کوي، چې څه ډول یې په دې هېواد کې شته ستونزې او وحشت ختم او پر ځای ی سوچه اسلامي نظام قائم کړ.
همدارنګه یې محصلینو ته په خطاب کې وویل: «ثالث عمر رحمه الله په هېواد کې شاوخوا پنځه کاله داسې مثالي امنیت ساتلی و، لکه اوس چې دی.»
د لوړو زده کړو سرپرست وزیر له محصلینو وغوښتل چې د محبوب زعیم امیرالمؤمنین ملا محمد عمر مجاهد رحمه الله د معلوماتو په اړه دې په دې سمینار اکتفاء نه کوي، بلکې د لوی ملا صاحب د ژوند، کارنامو او سیاسي بصیرت په اړه دې مطالعې او د مشرانو خبرو اورېدو ته پاملرنه وکړي او د هغه مبارک خوی او عادات دې په ځان کې پیدا کړي.
وروسته له اجنډا سره سم د محبوب زعیم امیرالمؤمنین ملا محمد عمر مجاهد رحمه الله د ژوند، کارنامو او تقواء په اړه د سمینار سنبالوونکو خپل پرېزنټېشنونه ارایه کړل او د محصلینو پوښتنو ته يې ځوابونه وویل.
نېټه:شنبه
۱۴۴۶هـ.ق، د ذوالقعدې ۵مه
۱۴۰۴هـ.ش، د ثور ۱۳مه
۲۰۲۵م، د مې ۳مه
