د کابل پولي تخنیک پوهنتون له دریو پوهنځيو څخه ۱۵۱ تنه انجنیران فارغ او ټولنې ته د خدمت لپاره وړاندې شول.
په یاده غونډه کې د کابل پولي تخنیک پوهنتون د کمپیوټر ساینس، جیوماتیک او کدستر او کیمیاوي صنایعو پوهنځيو ۱۵۱ انجنیرانو د فراغت جشن ولمانځل شو او همدارنګه دغه پوهنتون ته د ۱۴۰۲هـ.ش کال نویو شاملو شویو محصلینو ته ښه راغلاست وویل شول، د پوهنتون چاپېریال او اصولو اړوند لازمې لارښوونې او سپارښتنې ورته وشوې.
په کابل پولي تخنیک پوهنتون کې په همدې مناسبت جوړه شوې غونډه کې د یاد پوهنتون رئیس پوهنوال انجنیر عبدالرشید اقبال فارغېدونکو انجنیرانو ته د مبارکۍ تر څنګ، په خپله لارښوونیزه وینا کې وویل: «تاسو باید مسلکي اخلاق ولرئ، خپل مسلک ته ژمن پاتې شئ او کار پکې وکړئ.» نوموړي محصلینو ته ډاډ ورکړ چې تر فراغت وروسته هم د عملي کارونو او مشورو لپاره د کابل پولي تخنیک پوهنتون مشرتابه او استادان یې په خدمت کې دي.
همدارنګه د لوړو زده کړو وزارت د دولتي محصلانو رئيس استاد حامد یعقوبي یاد انجنیران لوړو موخو ته وهڅول او ویې ویل چې اسلامي امت تر غرب زیات ځوان بشري ځواک، معدني سرچینې او نورې عایداتي منابع لري، خو د نه استفادې له امله تر غرب وروسته پاتې دی.
دغه راز د لوړو زده کړو وزارت د محصلانو چارو د همغږۍ رئیس قاضي کلیم الله محمدي د فارغېدونکو انجنیرانو له کورنیو او پوهنتون له مسؤلینو مننه وکړه چې په سختو شرایطو کې یې د هېواد بچیانو لپاره د درس زمینه برابره کړې او محصلینو ته په خطاب کې یې وویل چې دا ستاسو د سند فراغت نه، بلکې د مسؤلیت سند دی، چې درکړل شو.
د یادونې وړ ده چې کابل پولي تخنیک پوهنتون ۸ پوهنځی لري او هر کال سلګونه انجنیران د هېواد د خدمت لپاره وړاندې کوي.
