د لوړو زده کړو وزارت د علمي معینیت شورا غونډه د دغه وزارت د علمي معین په مشرۍ جوړه شوه.
د غونډې په پیل کې د لوړو زده کړو وزارت علمي معین دوکتور لطف الله خیرخواه د هېواد د لوړو زده کړو د نظام د پروګرامونو او پلانونو په اړه خبرې وکړې او له ماتحت ریسانو څخه یې وغوښتل چې د دغو برنامو په تطبیق او پرمخ وړلو کې لا زیاتې هڅې وکړي.
وروسته د غونډې له اجنډا سره سم د کمیټې غړو د هغو استادانو د ستونزو په اړه چې په بهر کې د ماسټرۍ او دوکتورا په کچه زده کړې کوي راپور واورېد او په هېواد کې د کرونا ویروس له خپرېدو او سیاسي پرمختګونو وروسته یې د هغوی ښوونیز بهیر د ستونزو په اړه خبرې وکړې.
دغه راز په دغه غونډه کې د خصوصي لوړو زده کړو موسسو د ټولنيزو علومو په پوهنځيو کې د فراغت په پروګرامونو کې د علمي نصاب د کارولو د څرنګوالي، د يو شمېر اکاډميکو کارکوونکو د تقرر او ګوښه کولو د دوسيو او نورو اړوندو موضوعاتو په اړه خبرې وشوې او لازم تصميمونه ونيول شول.
