د امارتي پوهنتونونو محصلانو د خدمتونو او همغږۍ او د دیني جامعاتو د فاضلانو امرینو لپاره د وړتیا لوړونې پنځه ورځنی ورکشاپ پیل شو
یاد ورکشاپ د لوړو زده کړو وزارت محصلانو د خدمتونو او همغږۍ ریاست له لوري په کابل پوهنتون کې پیل شو، چې د لوړو زده کړو وزارت د محصلانو د خدمتونو او همغږۍ رئیس استاد کلیم الله محمدي د محصلانو د خدمتونو او همغږۍ برخې په مسؤلیتونو خبرې وکړې او ویې ویل: «انسان په خپل ژوند کې زیات مسؤلیتونه لري او پوښتنه ترې کېږي، موږ او تاسو ته د ټولنې مهم قشر (محصلان) را تر غاړه دي، باید د درسي روزنې ترڅنګ یې فکرې روزنې ته هم متوجه شو.»
نوموړي د ورکشاپ موخه د دې برخې د مسؤلینو د وړتیاوو لوړول او خپلو مسؤلیتونو ته لا زیات متوجه کول یاد کړل او ویې ویل چې د خپل اخلاقي مسؤلیت له مخې باید د حق دفاع او د باطل مخه ونیسو.
همدارنکه د کابل پوهنتون رئیس دوکتور اسامه عزیز د ځوانانو د مسلکي زده کړو ترڅنګ، د هغوي په فکري روزنه هم ټینګار وکړ او د ورکشاپ له ګډونوالو یې وغوښتل، چې په دغه پنځه ورځو کې د استادانو لخوا وړاندې کېدونکو موضوعاتو سربېره د یو بل له وړتیاوو هم استفاده وکړي.
همدا راز په یاد ورکشاپ کې له ویناوو وروسته د اسلامي نظام اهمیت او تقویه، د نیت او اخلاص او د ځوانانو د فکري او اخلاقي روزنې پر اړتیا هر اړخیز معلومات وړاندې شول.
نېټه: یکشنبه
۱۴۴۷ هـ.ق د صفر المظفر ۳۰ مه
۱۴۰۴ هـ.ش د سنلبې ۲ مه
۲۰۲۵ م د اګست ۲۴ مه
