د کابل پوهنتون له لوري د «چاپېریالي مدیریت او تلپاتې پرمختګ» په نامه علمي ـ څېړنیز کنفرانس تر سره شو.

۱۴۰۰کال، د سلواغې ۴مه
د کابل پوهنتون له لوري د «چاپېریالي مدیریت او تلپاتې پرمختګ» په نامه علمي ـ څېړنیز کنفرانس تر سره شو.
په دغه علمي ـ څېړنیز کنفرانس کې د لوړو زده کړو وزارت علمي معین دوکتور لطف الله خیر خواه د نبوي احادیثو په رڼا کې د چاپېریال ساتنې، بوټو او اوبو ارزښت ته په اشارې سره وویل، چې د چاپېریال پاک ساتل د ټولنې د هر فرد دنده ده. نوموړي د کابل پوهنتون چاپېریال ساتنې پوهنځي له دغې نوښت څخه مننه وکړه او د دا ډول علمي کنفرانسونو د جوړولو په برخه کې یې د لوړو زده کړو وزارت له لوري د هر ډول همکارۍ ډاډ ورکړ. 
وروسته د کابل پوهنتون رییس دوکتور اسامه عزیر وویل، چې الله تعالی په دنیا کې هر څه اړتیا ته په کتو او پخپله کچه پیداکړي، خو د انسانانو د ناسمې کارونې له امله زیانمن شوي دي. دوکتور اسامه عزیز زیاته کړه، چې له دا ډول څېړنیزو کنفرانسونو څخه مو موخه د ټولنې د ستونزو حل دی. 
د یادولو وړ ده، چې یاد علمي ـ څېړنیز کنفرانس د کابل پوهنتون چاپېریال ساتنې پوهنځي په نوښت جوړ شوی و، چې پکې د یادې پوهنځي د رییس پوهندوی محمد داود شیرزاد په ګډون 8 تنو استادانو خپلې څېړنیزې مقالې وړاندې کړې.