د لوړو زده کړو وزارت کارمندانو ته د انګلیسي ژبې درې میاشتنی او د مدیریت ۱۵ ورځنی روزنیز ورکشاپونه، چې د یاد وزارت د بشري سرچینو ریاست له خوا په لاره اچول شوی و، ګډونوالو ته یې د تصدیقونو په ورکړې سره پای ته ورسېدل.
د لوړو زده کړو وزارت د بشري سرچینو ریاست د دغه وزارت د بېلابېلو څانګو کارکوونکو لپاره د کاري ظرفیت لوړولو په موخه د ورکشاپونو او روزنیزو پروګرامونو پر دوام د وزارت د مرکزي ادارو کارمندانو ته د انګلیسي ژبې درې میاشتنی روزنیز پروګرام او د محصلانو د خدماتو او د وزارت مرکز د څلورو دویمي واحدونو کارکوونکو لپاره د ادارې او مدیریت په برخه کې ۱۵ ورځنی روزنیز پروګرام پای ته ورسېد.
د دغو پروګرامونو د پای په مراسمو کې د لوړو زده کړو وزارت د بشري سرچینو رئیس مفتي عبدالکریم امیري په ټولنه کې د ژبې د زده کړې په اغېزمنتوب او ارزښت خبرې وکړې او په دې برخه کې د د کارمندانو له حضور او لېوالتیا او همدارنګه د یاد ریاست د روزنې ظرفیت لوړونې آمریت له هڅو مننه وکړه.
وروسته د لوړو زده کړو وزارت د بشري سرچینو د روزنې او ظرفیت لوړونې آمر عبیدالله مولايي د دغو پروګرامونو په اهمیت خبرې وکړې او له ټولو ګډونوالو یې وغوښتل، چې هغه څه چې زده کړي یې دي په خپلو ورځنيو اداري چارو کې عملي او د غوره خدماتو برابرولو په موخه ترې ګټه پورته کړي.
