د لوړو زده کړو سرپرست وزیر دایکندي ولایت ته سفر وکړ.
د لوړو زده کړو سرپرست وزیر شیخ الحدیث مولوي نداء محمد ندیم دایکندي ولایت ته په خپل رسمي سفر کې د دایکندي لوړو زده کړو مؤسسې له مشرتابه، استادانو او اداري کارمندانو سره په ناسته کې د دغې مؤسسې د مسؤلینو غوښتنې او وړاندیزونه واورېدل.
د لوړو زده کړو سرپرست وزیر په یاده ناسته کې وویل چې زموږ راتګ له نیږدې د دې مؤسسې د چارو لیدنه ده. نوموړي د دایکندي لوړو زده کړو مؤسسې مسؤلینو ته ډاډ ورکړ چې اړتیاوې به یې پوره کوي او زیاته یې کړه چې د ا.ا.ا د پوهنتون او مدرسې پرمختګ او معیاري کولو ته ژمن دی او دا یې په عمل کې ثابته کړې ده.
دغه راز د لوړو زده کړو سرپرست وزیر د یادې مؤسسې له استادانو وغوښتل چې په پوره اخلاص او د خپلو زامنو په شان د محصلینو سالمه روزنه وکړي او د نورو ډلو تر فکري اغېزې لاندې رانشي.
وروسته د یادې مؤسسې مسؤلینو د دغې مؤسسې اړتیاوې، ستونزې او وړاندیزونه د لوړو زده کړو له سرپرست وزیر سره شریک کړل، چې نوموړي د یادې مؤسسې ۲۱ بېلا بېل پېشنهادونه منظور او په نورو برخو کې یې د پوره همکارۍ ډاډ ورکړ.
نېټه: یکشنبه
۱۴۴۶هـ.ق، د ربیع الثاني ۳ مه
۱۴۰۳هـ.ش، د میزان ۱۵مه
۲۰۲۴م، د اکتوبر ۶ مه
