د لوړو زده کړو سرپرست وزیر د ایران له سفیر سره په لیدنه کې پر دوه اړخیزو علمي او اکاډمیکو همکاریو خبرې وکړې
۱۴۰۰کال، د لړم ۱۲مه
د لوړو زده کړو سرپرست وزیر د ایران له سفیر سره په لیدنه کې پر دوه اړخیزو علمي او اکاډمیکو همکاریو خبرې وکړې.
په دغه لیدنه کې د لوړو زده کړو سرپرست وزیر الحاج مولوي عبدالباقي حقاني په داسې حال کې چې د دغه وزارت معینانو هم حضور درلود، د لوړو زده کړو په برخه کې د ایران له همکاریو مننه وکړه او ویې ویل، چې موږ د خپل هېواد د ابادۍ لپاره لاسونه رابډ وهلي او په دغه برخه کې د ایران اسلامي جمهوريت مرستو ته اړتیا لرو.
هغه زیاته کړه، چې د ایران او افغانستان تر منځ د دوه اړخیزو همکاریو، د بورسونو او په ایران کې د افغان مهاجرو د زده کړو او ستونزو د معلومولو لپاره به یو تخنیکي ټیم ایران ته لاړ شي او د یادو برخو جزیات به راټول او د حل په موخه به یې د ایران هېواد له اړوندو ادارو سره پرې په ګډه کار وشي.
همدارنګه د ایران سفیر بهادر امینیان په تحصیلي برخه کې له افغانستان د مرستو د ژمنې تر څنګ وویل، چې موږ به د افغانانو لومړیتوبونو ته په کتو له تخنیکي ټیم سره پوره همکاري وکړو او خپلې تحصیلي تجربې به هم له یاد ټیم سره شریکې کړو.
