د کمپیوټر ساینس ماسټري او د ښوونې او رزونې لېسانس څانګو د کمپیوټر زده کړې د تحصیلي نصاب د بیا کتنې او پراختیا دویم پړاو کلسټر پیل شو.
د یاد کلسټر په پرانیسته کې د لوړو زده کړو وزارت علمي معین دوکتور لطف الله خیرخواه په تحصیلی نصاب کې د استادانو او متخصصینو د کار پر ارزښت خبرې وکړې او ویې ویل: «په نصاب کې د هرې کلیمې لیکل او فکر کول د راتلونکو نسلونو سرنوشت ټاکي او دا ستاسو لپاره جاریه صدقه ده.»
نوموړي د طبیعي علومو پر تربیوي اړخ ټينګار وکړ او له استادانو یې وغوښتل چې د کمپیوټر ساینس د تخنیکي زده کړو تر څنګ تربیوي زده کړو ته هم پام وساتي. دوکتور لطف الله خیرخواه زیاته کړه چې اوسمهال په نړۍ کې د علم، ټکنالوژۍ او پرمختګ په پلمه کلتوري او فکري یرغل کېږي، چې باید مخه یې ونیول شي.
دغه راز د لوړو زده کړو وزارت د تحصیلي نصاب رئیس مفتي عبدالرؤف فراهي تجروبوي علوم د ټولنې اړتیا یاد کړل او ویې ویل چې د دیني او ټولنیزو علومو په اندازه باید کار ورته وشي. هغه همدا راز د یاد کلسټر په دویم پړاو کې د مفرداتو پر تکمیل ټینګار وکړ.
وروسته د تحصیلي نصاب د ملي کمیسیون غړي پوهنوال فرید احمد طنین د دغه پنځه ورځني کلسټر د کار بڼه تشریح کړه او ګډونوالو ته یې معلومات ورکړل.
