د پروان پوهنتون د مسلکي پرمختګ ( PDC ) مرکز د پېژندنې پروګرام جوړ شو
د پروان پوهنتون بېلابېلو ټولګیو استازو لپاره د دغه پوهنتون لخوا د مسلکي پرمختګ ( PDC ) مرکز د پېژندنې پروګرام جوړ شو.
په دغه پروګرام کې د پروان پوهنتون علمي چارو مرستیال پوهندوی ډاکټر سید مبین هاشمي د لوړو زده کړو وزارت د مشرتابه له لوري په دولتي بنسټونو کې د مسلکي پرمختګ مرکزونو د جوړولو پاملرنې له کبله مننه وکړه او د دغو مرکزونو د ارزښت په اړه یې معلومات ورکړل.
دغه راز له محصلینو یې وغوښتل چې تر خپلې وسې له دغو مرکزونو د خپلې وړتیا لوړولو او ورځنیو اړتیاوو پوره کولو لپاره ګټه پورته کړي. وروسته د یاد مرکز سرپرستې پوهنیار سیاه موی غوري د دغه مرکز د کاري لایحې، کاري مقاومت او په دغه مرکز کې د فعالیتونو د څرنګوالي په اړه معلومات ورکړل. پروګرام د ګډونوالو د پوښتنو له ځوابولو او د PDC مرکز د بېلابېلو برخو تر کتلو وروسته پای ته ورسېد.
د یادولو وړ ده چې د پروان پوهنتون مسلکي پرمختګ مرکز؛ له هغو ۱۴ مرکزونو دی چې تېره اونۍ د لوړو زده کړو وزارت علمي معین له لوري په انلاین توګه پرانیستل شو.
