د لوړو زده کړو (HEMIS) معلوماتي سیسټم څخه د ګټې اخیستنې لارښود پروګرام پیل شو
غزني پوهنتون د استادانو، تدریسي مدیرانو او د ډیپارټمنټونو د اجرایه مدیرانو لپاره د لوړو زده کړو له معلوماتو سیستم څخه د ګټې اخیستنې روزنیز پروګرام جوړ کړ.
په دغه پروګرام کې چې د غزني پوهنتون د محصلانو چارو مرستیال او معلوماتي ټکنالوژۍ په تخنیکي همکارۍ د الکترونیکي زده کړو د کمېټې په مټ ترسره شو، د یاد پوهنتون، د علمي او محصلانو چارو مرستیالانو، د پوهنځيو رئیسانو، د ډیپارټمنټونو آمرانو، استادانو، تدریسې عمومي مدیرانو او د ډیپارټمنټونو اجراییه مدیرانو ګډون درلود.
په پیل کې د غزني پوهنتون د الکترونیکي زده کړو د کمېټې مسؤل پوهنیار محمد عالم انوري د یادې کمېټې د کړنو او پروګرامونو په اړه وینا وکړه. ورپسې د غزني پوهنتون د محصلانو چارو مرستیال پوهنمل احمد رضا صالحي د یاد سیستم په اړه خپل چمتو کړی پرېزنټېشن ګډونوالو ته وړاندې کړ او اړوندې برخې یې تشرېح کړې. وروسته حفیظ الرحمن شهیدخیل د محصلانو چارو آمر او د یاد سیستم مسؤل خپل د ګډون راپور چې مخکې په کندهار پوهنتون کې جوړ شوی و، حاضرینو ته وړاندې کړ او پوښتنې یې ځواب کړې.
په پای کې معلوماتي سیستم په عملي ډول د پروګرام ګډونوالو ته تشرېح شو او پوښتنې یې ځواب شوې.
