د لوړو زده کړو وزارت د څيړنې، تألیف او ژباړې ریاست له لورې د څېړنې لارښود درې ورځنۍ ښوونیز ورکشاپ په بامیان پوهنتون کې د میدان وردګ، غور، دایکندي، بامیان، غزني او د غزني تخنیکي پوهنتون څو تنو استادانو ته دایر شو.
د ورکشاپ په پیل کې د لوړو زده کړو وزارت د څيړنې، تألیف او ژباړې رئیس دکتور حمیدالله مزمل د یاد ورکشاپ په اړه د معلوماتو ترڅنګ د پوهنتون له مسؤلینو او استادانو څخه وغوښتل چې د څيړنې د پرمختګ او پراختیا اړوند خپل مسؤلیتونه ادا کړي.
وروسته د بامیان پوهنتون رئیس حضرت محمد برهاني د لوړو زده کړو وزارت پلاوي، استادانو او نورو ګډونوالو ته د ښه راغلاست ترڅنګ په اسلام کې د څیړنې ارزښت او اهمیت په اړه خبرې وکړې.
ورپسې د بامیان پوهنتون علمي معاون او د څېړنې امر د څېړنې پر اړتیا او ارزښت خبرې وکړې.
د یادونې وړ ده چې په دغه ورکشاپ کې به د تحصیلي بنسټونو ۷۰ تنه استادانو ته ( د څېړنې پروپوزل لیکنې، د څېړنې لیکنې لارښود، د تألیف او ژباړې د علمي اثرونو د څېړنې لارښود او د شمېرو د تحلیل لارښود) په اړه درې ورځې ښوونه ورکړل شي.
