د لوړو زده کړو وزارت د معلوماتي ټکنالوژۍ ریاست د غوره انټرنېټي خدمتونو وړاندې کولو او همغږۍ په موخه د علمي پروګرامونو د پراختیا له ریاست سره ناسته وکړه.
۱۴۴۳/۱۲/۴
۱۴۰۱/۴/۱۲
د لوړو زده کړو وزارت د معلوماتي ټکنالوژۍ ریاست د غوره انټرنېټي خدمتونو وړاندې کولو او همغږۍ په موخه د علمي پروګرامونو د پراختیا له ریاست سره ناسته وکړه.
د لوړو زده کړو وزارت معلوماتي ټکنالوژۍ ریاست د دغه وزارت تر چتر لاندې ټولو ریاستونو او دولتي پوهنتونونو ته د انټرنېټ او ټکنالوژۍ اړوند خدمات پر غاړه لري.
د معلوماتي ټکنالوژۍ ریاست رئیس انجنیر احمد ضیاء جبارخېل وویل، چې د ادارو تر منځ د همغږۍ او ستونزو د حل په موخه مو د وزارت په مرکز کې له ریاستونو سره ګډې ناستې پیل کړي دي. نوموړي زیاته کړه چې د نورو خدمتونو تر څنګ مو په ۱۴۰۱کال کې د مرکز هر ریاست ته د MIS مدیریتي معلوماتي سیسټمونه ایجاد کړي دي.
دغه راز د علمي پروګرامونو د پراختیا رئیس انجنیر روح الله روحاني د ریاستونو تر منځ پر همغږۍ ټينګار وکړ او ویې ویل چې موږ ټول د یوې موخې او یوه دولت لپاره کار کوو، نو پکار ده چې له یوبل سره په همکارۍ خپل کارونه مخ ته یوسو.
د یادولو وړ ده چې د معلوماتي ټکنالوژۍ ریاست تر دې مخکې د مالي او حسابي، تضمین کیفیت او اعتبار ورکونې او بشري سرچینو له ریاستونو سره هم د همغږۍ ګډې ناستې کړي دي.
