د لوړو زده کړو وزارت د استادانو د تقرر او علمي ترفیعاتو نوي رئیس رسما خپله دنده پېل کړه
د لوړو زده کړو سرپرست وزیر او علمي مرستیال پوهنمل عبدالتواب بالاکرزي د استادانو د تقرر او علمي ترفیعاتو نوي رئیس پوهندوی دوکتور غلام رحیم اواب د معرفي په ترڅ کې وویل: دوکتور اواب د هیواد له تکړه او مجربو کادرونو څخه دی چې د هیواد د لوړو زده کړو په ډګر په ځانګړي ډول ننګرهار پوهنتون کې یې ارزښتمن خدمتونو سرته رسولي دي.
د لوړو زده کړو سرپرست وزیر هیله وښوده، چې د استادانو د تقرر او علمي ترفیعاتو د رئیس په توګه د استاد اواب له تجربو څخه به لویه ګټه پورته کړای شي.
وروسته د استادانو د تقرر او علمي ترفیعاتو نوي رئیس پوهندوی غلام رحیم اواب د جمهوري ریاست د مقام او لوړو زده کړو وزارت څخه پر ده باندې د باور کولو له امله مننه وکړه او ژمنه یې وښوده، چې استادانو ته د خدماتو وړاندې کولو په لارو چارو او د لوړو زده کړو وزارت د پروګرامونو په تطبیقولو کې به خپل وظيفوي مسوولیت په ښه توګه سر ته ورسوي.
پوهندوی دوکتور غلام رحیم اواب د ننګرهار پوهنتون طب پوهنځي د وقایوي طب ډيپارټمنټ علمي کادري غړی دی او خپلې زده کړې یې د فوق Ph.D تر کچې له هیواده بهر بشپړې کړې دي.
دوکتور غلام رحیم اواب د افغانستان خلکو او روغتیایي سيستم ته د دوه نیمو لسیزو اکاډمیک او مسلکي خدمت په اوږدو کې په ملي او نړیوالو ډګرونو کې د مسلکي کادرونو په روزنه، ظرفیت جوړونه، اداره، مدیریت او رهبرۍ، سیسټم جوړونه، کاري تفاهم او مشارکت او د منابعو را ټولونه او نورو مدیریتي ارزښتونو کې زیاتې تجربې په خپله کاري مخینه کې ثبت کړې دي. نوموړي له ۱۵ زیاتې څيړنيزې مقالې په نړيوالو معتبرو ژورنالونو کې او همدارنګه يې ګڼ شمیر څيړنيزې، علمي او فرهنګي مقالې په ملي مجلو او ژورنالونو کې خپرې کړې دي او همدارنګه یې له ۵۰ څخه په زیاتو ملي او نړيوالو کنفرانسونو کې ګډون کړی دی.
