د لوړو زده کړو سرپرست وزیر په مشرۍ د دغه وزارت رهبري شورا ناسته ترسره شوه
د ناستې په پیل کې د لوړو زده کړو سرپرست وزیر محترم شیخ الحدیث مولوي نداء محمد ندیم د ا.ا.ا له حاکمیت وروسته د لوړو زده کړو په برخه کې ځینو مهمو لاسته راوړنو او پرمختګونو ته اشاره وکړه او ویې ویل: «الحمدالله تر فتحې وروسته په تېرو څو کلونو کې د لوړو زده کړو وزارت په بېلا بېلو برخو کې د پام وړ مثبت او تاریخي بدلونونه راغلی دي، کیفیت ته پاملرنه زیاته شوې او په پوهنتونونو کې د خیالي محصلینو مخنیوی شوی دی.»
محترم شیخ صاحب همدا راز د وزارت له بېلا بېلو مسوولینو او د شورا له غړو وغوښتل چې په خپلو ورځنیو چارو کې پوره پاملرنه وکړي، د مسوولیت احساس ژوندی وساتي او ترې ویې وغوښتل چې خپل فعالیتونه د اسلامي ارزښتونو سره سم لا تنظیم کړي. همدا راز ورته ویې ویل چې د خپلو اړوندو کارکوونکو مسوولیتونو ته متوجه و اوسي او اسلامي نظام ته د ژمنتیا روحیه لا پیاوړې وساتي، څو له بیت المال څخه سمه استفاده او له غفلت څخه ډډه شوې وي.
ورپسې د تېرې شورا پرېکړې تعقیب او د اجنډا له مخې پر ځینو مهمو موضوعاتو لکه؛ د امارتي پوهنتونونو له لوري د خصوصي لوړو زده کړو نهادونو د څارنې لارښود، د امارتي تحصیلي نهادونو د فوق لېسانس برنامو د ازموینې لارښود، د تحصیلي نهادونو د تدریس کیفیت لوړولو طرحه، لېسانس برنامو کې د تحصیلي دورې د مودې ټاکنه او یو شمېر نور مهمو موضوعاتو اړوند بحث او لازمې پرېکړې وشوې.
