د لوړو زده کړو سرپرست وزیر په لارښوونه او د دغه وزارت د دعوت او ارشاد رئیس شیخ شاکرالله وحدت په مشرۍ د اداري کارمندانو د ارزونې په موخه ټاکل شوې پنځه کسیزې کمېټې خپل کار پیل کړ.
د یادې کمېټې موخه د اداري کارمندانو د ورځنیو فعالیتونو، نوښتونو، لاسته راوړنو، د کاري پلان تطبیق، حاضرۍ ته ژمنتیا او له مراجعینو سره د چلند ارزونه کیږي، ترڅو له یوې خوا د لوړو زده کړو وزارت کارکوونکي خپلو کارونو او فعالیتونو ته لا متوجه شي او له بلې خوا د فعالو او غیر فعالو کارکوونکو تر منځ تفکیک او د مکافاتو او مجازاتو اصل په اداره کې پلی شي.
په پام کې ده چې دغه کمېټه به د اداري کارکوونکو تر ارزونې وروسته خپل راپور د لوړو زده کړو وزارت له مشرتابه سره شریک کړي.
د یادولو وړ ده چې په دغه کمیټه کې د تحقیق، تألیف او ژباړې رئیس دوکتور حمید الله مزمل، د بشري سرچینو رئیس مفتي عبدالکریم امیري، د داخلي پلټنې رئیس مولوي خالد افغان او د اطلاعاتو، نشراتو او عامه اړیکو رئیس قاري محمد سلیمان شریفي غړیتوب لري.
