د لوړو زده کړو سرپرست وزیر د کلیو د بیا رغونې او پراختیا وزارت د دعوت او ارشاد ریاست د کلنۍ ازموینې د پایلو په غونډه کې ګډون او وینا وکړه.
په یاده غونډه کې د لوړو زده کړو سرپرست وزیر شیخ الحدیث مولوي نداء محمد ندیم صاحب د کلیو د بیا رغونې او پراختیا وزارت د کلیو د بیا رغونې معین مفتی سید احمد مستقیم، د یاد وزارت د پلان او پالیسۍ معین شرف الدین مسلم او همدا راز د نوموړي وزارت کارکوونکو ګډون درلود.
په پیل کې د لوړو زده کړو سرپرست وزیر کارکوونکو ته په خطاب کې وویل، چې دا نظام زموږ او ستاسو د ټولو شریک نظام دی، تاسي په دې کیښتۍ کې له موږ سره یوځای یاست، دا کيښتۍ به په ګډه پر مخ بیایو او یو له بل سره به پوره همکاري کوو. نوموړي زیاته کړه چې له مراجعینو سره سم چلند کوئ او په کارونو کې غفلت او بي پروايي مکوئ.
سرپرست وزیر د افغانستان اسلامي امارت له حکومت الهدایه سره تشبیه کړ؛ هغه حکومت چې چارواکو ته يې مادیات نه دي مطرح بلکې ستره موخه یې خلکو ته خدمت او د دین اقامه ده.
وروسته د کلیو د بیا رغونې او پراختیا وزارت د پلان او پالیسۍ معین شرف الدین مسلم د یادې غونډې جوړیدو په اړه خوښي وښوده او زیاته يې کړه چې امربالمعروف او نهی عن المنکر د ټولو پیغمبرانو دنده وه، اوس دا وجیبه د امربالمعروف او نهی عن المنکر وزارت پر غاړه ده.
په پای کې هغه کارکوونکو ته چې په دغه کلنۍ ازموینې کې یې لوړې نمرې وړې وې، د یاد وزارت د دعوت او ارشاد ریاست له لورې ستاینلیکونه ورکړل شول.
