د لوړو زده کړو سرپرست وزیر او علمي مرستیال پوهنمل عبدالتواب بالاکرزي د ماليې سرپرست او نوماند وزیر عبدالهادي ارغندیوال سره د لوړوزده کړو وزارت پراختیایې پروژو پر بودیجوي موضوعاتو خبرې وکړې.
د لوړو زده کړو سرپرست وزیر د مالیې وزارت له دوامدارې همکارۍ څخه د مننې په ترڅ کې، ددغه وزارت د پراختیایې پروژو په اړوند معلومات وړاندې کړل او ویې ویل: د هیواد په ۳۳ ولایتونو کې د لوړو زده کړو وزارت د پراختیایې پلان پر مټ په لوړو زده کړو بنسټونو کې ۸۰ پراختیایې پروژې چې د تدریسي او اداري اړتیاوو د پوره کولو په موخه باید پلې کړای شي تر څو د زیربناء له پلوه د هیواد پوهنتونو په مخکې پرتې ستونزې لرې شي او له بل اړخه په هغه شمیر بنسټونو کې چې نسبت پخوا ته د ودانیو له کمښت سره مخ دي د تحصیل مصوونه زمینه برابره شي.
پوهنمل عبدالتواب بالاکرزي زیاته کړه: د مالیې وزارت د هڅو په پایله کې تر اوسه پورې د هیواد په ۸ تحصیلي بنسټونو کې د آسیایي پراختیایې بانک له اړخه د ۱۸ پراختیایي پروژو اړوند ژمنې تر سره شوې دي چې د هغوی په تخنیکي برخو کار پیل شوی دی، خو د دغو پروژو د ډیزاین څرنګوالی د آسیایي بانک پالیسي ته په کتو د بودیجې د نه اختصاص په وجه وروسته پاتې دی چې باید د یادو پروژو د ستونزو له منځه وړلو او ورباندې کار پیلولو په موخه د مالیې وزارت د هغوی د ډيزاین لګښتونه تمویل کړي.
پوهنمل بالاکرزي په ډاګه کړه چې د مالیې محترم وزارت د پروژو د اعمار او په دغه برخه کې د افغانستان له حکومت سره د تمویلوونکو د همکارۍ جلبولو په موخه د لوړو زده کړو وزارت د پام وړ بودیجې د برابرولو په برخه کې کومه ژمنه کړې وه، باید همکاري وکړي تر څو هغوی په دې برخه کې خپلې ژمنې عملي کړي.
د مالیې سرپرست او نوماند وزیر عبدالهادي ارغندیوال وویل چې په افغانستان کې د کرونا وایرس خپريدو ته په پام سره، زموږ اساسي لومړیتوب ددې وایرس او د هغه د پایلو سره مبارزه کول دي خو له دې سره بیا هم د لوړو زده کړو سکټور زیات مهم دی او د حکومت په لومړیتوبونو کې دی له همدې امله کوښښ کوو چې موجودو امکاناتو ته په کتو سره د هیواد له تحصیلي سکټور سره همکاري وکړو.
د مالیې سرپرست وزیر ډاډ ورکړ چې د یادو شوو پروژو د ډیزاین لګښتونه به تمویل کړي او د مالي کال په منځ کې د بودیجې د تفتیش پر وخت به د لوړو زده کړو وزارت پراختیایې پروژې په بودیجه کې شاملې کړای شي.
د غونډې په پای کې پریکړه وشوه تر څو د بودیجې عمومې ریاست، د ماليې او لوړو زده کړو وزارتونو د مرستو د انسجام ادارو څخه جوړ تخنیکي ټیمونه پخپل منځ کې سره کیني او د یادو شویو ودانیو د طرحې او ډيزاین بودیجوي ستونزو د حل د څرنګوالي او د تمویلونکو د مرستو را جلبولو په موخه له هغوی سره د همغږۍ ناسته وکړي.
