د لومړي ځل لپاره د خصوصي تحصیلي بنسټونونو د دایمي استادانو د تقرر او تثبیت پروسه پیل شوه.
د لوړو زده کړو وزارت د تقرر او ترفیعاتو رئیس په مشرۍ د دغه وزارت پلاوي له لوري په خصوصي پوهنتونونو کې د علمي کادر د تقرر لایحې له مخې د جنوب شرق زون خوست ولایت پامیر، ابدالي، دعوت او پکتیا ولایت زمزم خصوصي تحصیلي بنسټونو د دایمي استادانو د تقرر او تثبیت پروسه ترسره شوه.
د لوړو زده کړو وزارت د تقرر او ترفیعاتو رئیس انجنیر مفتاح الدین عزام په وینا، یاده پروسه به په ټولو خصوصي پوهنتونونو کې عملي کېږي، د خصوصي پوهنتونونو د استادانو د تقرر دوسیې به امارتي پوهنتونونه طی مراحل کوي او پر اساس به یې دایمي استادان مقرریږي.
د یادونې وړ ده چې د لوړو زده کړو وزارت یاد پلاوي د شیخ زایدـ خوست او پکتیا پوهنتونونو له مشرتابه سره هم ناستې وکړې او د یادې پروسې پر عملي چارو یې بحث ورسره وکړ.
