د فراه لوړو زده کړو مؤسسې غوره څېړونکي او ممتاز محصلین د یوې ناستې په ترڅ کې وستایل.
د فراه لوړو زده کړو مؤسسې د څېړنې او علمي مجلې او د فرهنګي او نشراتي کمېټې په هڅو او نوښت جوړه شوې ناسته کې د دې مؤسسې د ممتازو او غوره څېړونکو محصلینو کارونه او څېړنې وستایل شوې.
په یاده ناسته کې د فراه لوړو زده کړو مؤسسې رئیس مفتي نعمت الله انصاري وویل: «چې زموږ د نن ورځې محصلینو د سبا ورځې علمي کادرونه او متخصصین دي، چې همدوی به دا هېواد ودانوي او راتلونکی به یې ټاکي.»
نوموړي د دا ډول تشویقي پروګرامونو له جوړولو خوښي څرکنده کړه او د محصلنو هڅې یې وستایلې.
وروسته د فراه لوړو زده کړو مؤسسې د ښوونې او روزنې، کرنې او اقتصاد پوهځینو رئیس صاحبانو په خپل وار سره د علم پر ارزښت خبرې وکړې او د علم په برخه کې یې محصلین لا ډېرو هڅو ته وهڅول.
د یادولو وړ ده چې د ناستې په پای کې د یادې مؤسسې د مشرتابه له لوري ممتازو محصلینو ته ستاینلیکونه ورکړل شول.
