د تدراکاتو ځانګړی ښوونیز پروګرام د مرکز او ولایاتو پوهنتونو د مالي او اداري مرستیالانو، د تدارکاتو آمرانو او عمومي مدیرانو په ګډون سره تر سره شو
د لوړو زده کړو وزارت مالي او اداري مرستیال دوکتور احمد سیر مهجور، ددغه پروګرام تر سره کول د کارکونکو د تدارکاتي ظرفیت او پوهې د لوړوالي لپاره زیات مهم و باله او زیاته یې کړه چې د تدارکاتي مدیریت د اصولو زده کړه او ورسره بلدیدل په لوړو زده کړو بنسټونو کې د آسانتیا او د بودیجې د اغیزناک او پر ځای لګښت باعث ګرځي.
دوکتور مهجور په روان مالي کال کې د لوړو زده کړو د رهبرۍ هئیت پریکړو شرحه کولو په ترڅ کې د انډولونو پر اساس د بودیجې د ویش په اړه هم خبرې وکړې، هغه یې د عدالت پلي کولو او کیفیت ښه کولو په لاره کې یو مهم ګام وباله او د ملي تدارکاتو د قانون سره سم د بودیجې په اغیزناک او پر ځای لګښت باندې یې ټینګار وګړ.
مالي او اداري مرستیال په ټولو تحصیلي بنسټونو کې د تدارکاتو برخې له ټولو کارکونکو څخه وغوښتل، چې په اداري ریښتینولۍ، ژمنتیا او میړانې سره د خپلې بودیجې د لګښت په برخه کې د روڼتیا، چټکتیا او اغیزمنتیا په نظر کې نیولو سره پریکړه وکړي او تر څنګ یې هڅه وکړي چې په تدارکاتو کې کیفي بدلونونه په علمي بنسټونو کې د پرمختګ وسیله وګرځوي.
د لوړو زده کړو وزارت د تدارکاتو رئیس عبدالله صوفي زاده د لوړو زده کړو لپاره د ځانګړي زده کړه ییز پروګرام پرلاره اچولو موخه ددې برخې د کارمندانو له خپلو کاري چارو سره همغږي او بلدتیا وبلله او ویې ویل چې د تدارکاتو برخې کارمندان له هغې وجې چې تدارکات کوم اهمیت لري د ظرفیت لوړولو ته اړتیا لري او د دوي دغه پروګرامونه د دوی د پریکړو او مهو کارونو لپاره زیاته مرسته کولای شي.
دغه پروګرام د شپږو ورځو لپاره د ملي تدارکاتو انسټیټوټ د ټرینرانو له اړخه پر مخ وړل کیږي.
