د افغانستان اسلامي امارت په هیواد کې د علم او پوهې پیاوړتیا او پراختیا ته ژمن دی او د هیواد د تحصیلي بنسټونو د پرمختګ او پراختیا لپاره هېڅ ډول هڅه نه سپموي.
په همدې موخه په کابل کې په جوړو شویو مراسمو کې د وردګ لوړو زده کړو موسسې د کرنې پوهنځي له دوو څانګو څخه ۱۳۷ تنه محصلین فارغ او ټولنې ته د خدمت په موخه وړاندې شول.
د وردګ لوړو زده کړو موسسې رئیس فارغانو او د هغوی کورنیو ته د مبارکۍ ویلو ترڅنګ وویل چې د افغانستان اسلامي امارت د هېواد د تحصیلي بنسټونو پیاوړتیا او پراختیا ته ژمن دی او په دې برخه کې به هېڅ راز هڅې نه سپموي.
نوموړي وویل، چې دا مهال د لوړو زده کړو وزارت د رهبرۍ د هڅو له امله په وردګ لوړو زده کړو موسسه کې په ۱۶ پروژو کار روان دی، دا تحصیلي بنسټونو ته د افغانستان اسلامي امارت د پاملرنې یوه بېلګه ده.
دغه راز د فراغت په دې مراسمو کې د ټولګټو وزارت مرستیال، د وردګ لوړو زده کړو موسسې د کرنې او شرعیاتو پوهنځیو رئیسانو او یو شمېر نورو ویناوالو په ټولنه کې د ساینس او پوهې، د ماسټرۍ او دوکتورا په برخه کې لوړو زده کړو ته د محصلینو هڅولو، خلکو او هېواد ته صادقانه خدمتونو وړاندې کولو او نورو موضوعاتو په اړه خبرې وکړې.
د یادولو وړ ده چې د وردګ لوړو زده کړو موسسه په ۱۳۹۳ هـ.ش کال کې د میدان وردګ ولایت په دشت توپ سیمه کې د یو پوهنځی او دوو څانګو په درلودلو سره تاسیس شوه او دا مهال دغه تحصیلي موسسه ۵ پوهنځي او ۱۰ څانګې لري.
