د ننګرهار پوهنتون او ننګرهار مېشتو خصوصي پوهنتونونو او لوړو زده کړو موسسو استادانو ته دیني- علمي سیمینار دایر شو.
یاد سیمینار، چې دوه ورځې به دوام وکړي، د لوړو زده کړو وزارت د دعوت او ارشاد ریاست او ننګرهار پوهنتون په همغږۍ جوړ شوی، چې د ننګرهار پوهنتون او د ننګرهار ولایت د شپږو خصوصي پوهنتونونو او لوړو زده کړو موسسو نږدې زر تنه استادان او د علمي کادر غړي په کې برخه لري.
د سیمینار د پرانیستې په مراسمو کې د ننګرهار پوهنتون او د ننګرهار ولایت د خصوصي پوهنتونونو او لوړو زده کړو موسسو د مشرتابه او استادانو سربېره د لوړو زده کړو وزارت علمي معین، سلاکار او د یاد وزارت د دعوت او ارشاد ریاست مسؤلینو او علما کرامو برخه لرله.
په دغه سیمینار کې د لوړو زده کړو وزارت علمي معین دوکتور لطف الله خیرخواه په خپلو خبرو کې د بهرني کلتوري یرغل د مخنیوي او د محصلینو او ځوانانو د فکري روزنې لپاره د دغه ډول سیمینارونو دایرول مهم وبلل او زیاته یې کړه، چې د فکري روزنې د بحثونو لړۍ باید پوهنځیو او صنفونو ته وغځېږي.
دوکتور خیرخواه زیاته کړه: « زموږ پوهنتونونه باید د مسلکي زده کړو تر څنګ د ټولنې او انسانیت د ژغورنې په مرکزونو بدل شي.»
همداراز د ننګرهار پوهنتون رئیس پوهاند دوکتور خلیل احمد بهسودوال د یاد سیمینار په اړتیا او ارزښت خبرې وکړې او هغه یې د پوهنتونونو او دیني مدارسو او په ټوله کې د دیني او عصري علومو د نږدیوالي لپاره اړین وباله.
نوموړي د لوړو زده کړو وزارت له مشرتابه مننه وکړه او په راتلونکې کې يې د ورته نورو سیمینارونو د جوړېدو غوښتنه وکړه.
د لوړو زده کړو وزارت مقام سلاکار شیخ عبدالله سیحان، د ننګرهار پوهنتون د علمي چارو مرستیال پوهندوی احسان الله ناصح او د خصوصي پوهنتونونو په استازیتوب د روښان لوړو زده کړو موسسې رئیس فاتح ګل شینواري د غونډې نور ویناوال وو، چې د یاد سیمینار په دایرېدلو یې خوښي وښوده او په راتلونکې کې یې د ورته سیمینارونو په جوړېدلو تاکید وکړ.
د سیمینار په دویمه برخه کې د ننګرهار د علماوو او متنفذینو شورا رئیس شیخ الحدیث حضرت جان او د ننګرهار پوهنتون د شرعیاتو پوهنځي استاد شیخ الحدیث ضیاءالله حکیمي د (د ټولنې په جوړښت کې د ښه نیت او اخلاص اغېز) او (د بریالي استاد صفات او وظیفوي امانتداري) تر سرلیکونو لاندې موضوعات ارایه کړل او د اړوندو موضوعاتو په اړه یې د ګډونوالو استادانو پوښتنې ځواب کړې.
