د لوړو زده کړو وزارت علمي معين پخپل کاري دفتر کې د کورنیو چارو وزارت د تحصيلي او تعليمي چارو د همغږۍ له رئیس او مل پلاوي سره وکتل او د علمي او اکاډمیکو همکاریو د پیاوړتیا پر څرنګوالي یې خبرې وکړې.
په دې کتنه کې د لوړو زده کړو وزارت علمي معين دوکتور لطف الله خیرخواه په داسې حال کې چې د دغه وزارت د تحصيلي نصاب او علمي پروګرامونو د پراختیا رئیسانو هم شتون درلود، د همکاریو پر لارو چارو او ګډو علمي او اکاډمیکو پروګرامونو په اړه خبرې وکړې.
نوموړي وويل، د بېلابېلو ادارو ترمنځ د ګډو پروګرامونو د مخ ته وړلو په برخه کې همغږي او همکاري ډېرې اغېزمنه او د تمې وړ پايلې لري، چې په دې برخه کې د لوړو زده کړو وزارت يو شمېر امارتي ادارو سره د همکارۍ هوکړه ليکونه لاسليک کړي دي.
همدا راز د لوړو زده کړو وزارت علمي معين وویل، چې د لوړو زده کړو وزارت په بېلابېلو ادارو کې استعداد لرونکي کادرونه او تجربه لرونکي کسان لري، چې د هېواد د نورو امارتي ادارو لپاره ښه همکار کېدای شي.
ورپسې د کورنیو چارو وزارت د تحصيلي او تعليمي چارو د همغږۍ ریاست سرپرست مولوي عبدالظاهر د لوړو زده کړو وزارت علمي معین د همکارۍ له روحیې څخه د مننې ترڅنګ د خپلو اړتیاوو او علمي او اکاډمیکو پروګرامونو په اړه معلومات ورکړل.
نوموړي د لوړو زده کړو وزارت له علمي معين څخه وغوښتل چې د استادانو د ظرفیتونو لوړولو، د ښوونیزو نصابونو بیا کتنې، د پولیسو د اکاډمۍ د لیکچرونو په بډایه کولو، د روزونکو د ظرفیت لوړولو، تحصيلي بورسونو، د لیسانس او فوق لیسانس تحصیلي پروګرامونو د زمينې برابرولو، د سیمینارونو او نورو علمي او اکاډمیکو پروګرامونو د جوړولو په برخه کې همکاري وکړي، چې د لوړو زده کړو وزارت علمي معين له لوري د همکاریو ډاډ ورکړل شو.
د دې ليدنې په پای کې د لوړو زده کړو علمي معين دکتور لطف الله خیرخواه د کورنیو چارو وزارت له یاد پلاوي څخه وغوښتل چې خپل اړتیاوې او د اړتیا وړ پروګرامونه دې د رسمي لارو څخه دوی په واک کې ورکړي، ترڅو د دې وزارت اړوندو ادارو سره د همکارۍ په موخه شريک شي.
