د لوړو زده کړو وزارت اطلاعاتو، نشراتو او عامه اړیکو ریاست له لوري د هېواد امارتي تحصیلي بنسټنونو د نشراتو مسؤلینو لپاره، د هغوی مسلکي ظرفیت لوړونې او فکري روزنې په موخه دوه ورځنی روزنیز ورکشاپ پیل شو
د یاد ورکشاپ د پرانیستې په مراسمو کې د لوړو زده کړو وزارت علمي معین دوکتور لطف الله خیرخواه د دې ورکشاپ د جوړولو له امله د اطلاعاتو، نشراتو او عامه اړیکو ریاست څخه د مننې تر څنګ، پر تبلیغاتي جګړه، د رسنیو ارزښت او د خلکو او ټولنې پر وړاندې د امارتي رسنیو پر مسؤلیتونو خبرې وکړې.
نوموړي زیاته کړه چې رسنۍ د خلکو او مسؤلینو تر منځ د ارتباطي پلُ حیثیت لري او هغه یې د نظام لومړۍ قوه وبللې.
د لوړو زده کړو وزارت علمي معین د غربي هېوادونو پر تبلیغاتو خبرې وکړې او ویې ویل چې په تېر شل کلن اشغال کې غربي هېوادونو، په ځانګړي ډول امریکا د واقعیت خلاف او له بېلا بېلو لارو د افغانستان خلکو او جهاد پر وړاندې تبلیغات کول او د خلکو ذهنونونه یې مغشوشول.
دوکتور لطف الله خیرخواه د دښمن د دروغو او پروپاګند پر وړاندې د امارتي رسنیو مسؤلیت ډېر مهم وباله او له هغوی څخه یې وغوښتل چې د اسلام مبین دین له اصولو سره سم واقعیتونه بیان کړي او د دښمن د تبلیغاتي جګړې پر وړاندې په خپلو فعالیتونو کې لا ډېره هڅه وکړي.
همدارنګه د لوړو زده کړو وزارت د اطلاعاتو، نشراتو او عامه اړیکو رئیس قاري محمد سلیمان شریفي د یاد ورکشاپ پر ارزښت او موخې خبرې وکړې او ویې ویل چې د دې ورکشاپ موخه د تحصیلي بنسټونو د نشراتي مسؤلینو ظرفیت لوړونه، د نشراتي فعالیتونو همغږي کول، فکري روزنه او د مسؤلینو له لوري د هغوی د ستونزو اورېدل دي.
دغه راز د ا.ا.ا مرسیتال ویاند بلال کریمي د اسلامي امارت د نشراتي پالیسۍ په اړه معلومات ورکړل او ویې ویل: «د ا.ا.ا نشراتي پالیسي د اسلام پر اساساتو، منطق، وقار او ملي ارزښتونو ولاړه ده.» نوموړي زیاته کړه چې د ا.ا.ا په نشراتي پالیسۍ کې هغو خبرونو ته ځای نشته چې قومي، مذهبي، ژبنیو او سیمه ییزو تعصوبونو ته لمن وهي او په ټولنه کې ستونزې راولاړوي.
ښاغلي کریمي وویل چې د اشخاصو بې احترامي، سپکاوی او همدارنګه د دیني او ملي ارزښتونو سپکاوی د اسلامي نظام له نشراتي پالیسۍ سره په ټکر کې دي، چې باید ډډه ترې وشي.
وروسته د کابل پوهنتون استادانو پوهنیار ننګیالی ننګیال د ویډیو ګرافي او پوهنوال دوکتور شفیق وردګ د خبر پر معیارونو او ارزښتونو، د کابل طبي علومو پوهنتون د نشراتو امر صبغت الله سجاد د اسلامي رسنیزو اخلاقو او ویډیویي راپور او د باختر خبري اژانس رئیس مولوي ضیاء الحق حقمل په نشراتي فعالیتونو کې اړینې سپارښتنې په برخو کې خپل پرېزنټېشنونه وړاندې کړل او د ګډونوالو پوښتنو ته یې ځوابونه وویل.
د یادولو وړ ده چې دغه ورکشاپ د کابل پوهنتون په امام قتیبه (رح) تالار کې جوړ شوی، چې سبا به هم دوام وکړي.
