په لوړو زده کړ و وزارت کې د بیرغ ملي ورځ ونمانځل شوه
"د افغانستان درې رنګه ملي بیرغ، زموږ د خلکو تر منځ د جمهوریت، برابرۍ، غښتليتوب، عزت، غرور او یووالي سمبول دی، ساتنه او درناوی یې باید وکړو."
دا وینا د لوړو زده کړو وزیر دکتور عباس بصیر په داسې حال کې چې د وزارت مشرتابه پلاوی او یو شمېر کارکوونکو شتون درلود او د زمري اوومه نېټه د ملي بیرغ ورځې په ویاړ د لوړو زده کړو په وزارت کې ځانګړې نمانځغونډه جوړه کړه.
په دې مراسمو کې د لوړو زده کړو وزیر دکتور عباس بصیر د دې ورځې مبارکۍ ترڅنګ وویل، ملي بیرغ زموږ د خلکو ترمنځ د جمهوریت، برابرۍ، غښتليتوب، عزت، غرور او یووالي سمبول وباله او ویې ویل چې دا بیرغ موږ ته زیات اهمیت لري او کله چې د ورزشکارانو او نورو ویاړ راوړونکو له خوا د نړيوالو په ډله کې ورپېږي نو ټول خپل ځانونه ورپورې تړلي بولو، د غرور او ویاړ احساس کوو.
لوړو زده کړو وزیر د لوړو زده کړو وزارت ساتنې قطعې ته هم درناوی وکړ، د هېواد ملي دفاع او امنیتي ځواکونو د ملي بیرغ، عرضي تمامیت، او جمهوري ارزښتونو ساتونکي وبلل او د هغوی سرښندنې وستایلې.
نمانځغونډه د لوړو زده کړو وزیر لخوا د درې رنګه ملي بیرغ په پورته کولو او د هېواد د پرمختګ، ابادۍ په دعا پای ته ورسېده.
د یادونې وړ ده چې د افغانستان اسلامي جمهوري ریاست عالي مقام د هدایت او د هېواد بیرغ ته درناوي پر بنسټ د زمري اوومه د ملي بیرغ ورځ په نامه ونومول شوه او دا ورځ به هرکال د هېواد ملي یووالي او خلکو ترمنځ همغږي لا زیات ټینګوالي او په ټول هېواد کې د حب الوطن احساساتو ښودلو لپاره په ځانګړیو مراسمو کې ونمانځل شي.
