د هېواد تحصیلي بنسټونو د جیولوجي او معدن، ځمک پېژندنې او چاپېریال ساتنې څانګو د تحصیلي نصاب د بیاکتنې او پراختیا لومړی دور کلسټر پیل شو.
د یاد کلسټر په پرانیسته کې د لوړو زده کړو وزارت د تحصیلي نصاب رئیس مفتي عبدالروف فراهي د یاد کلسټر په اړه معلومات ورکړل او ویې ویل، چې د دغه کلسټر لپاره مو د هېواد دولتي او خصوصي تحصیلي بنسټونو سربېره د اړوندو ادارو متخصصین هم رابللي، چې د ۵ ورځو په جریان کې به د یادو پوهنځیو پر تحصیلي نصاب تخصصي بحثونه وکړي.
دغه راز نوموړي زیاته کړه چې د تحصیلي نصاب د بیاکتنې او پراختیا موخه د هېواد تحصیلي نصاب له نړیوالو او عصري معیارونو سره برابرول او د افغانۍ ټولنې اړتیاوو ته د ځواب ویونکي نصاب برابرول دي.
وروسته د تحصیلي نصاب د ملي کمیسیون غړي پوهندوی داود شاه فاروق د یوه پرېزنټېشن په ترڅ کې د یاد کلسټر د کار بڼې په اړه هر اړخیز معلومات وړاندې کړل.
نېټه: یکشنبه
۱۴۴۴/۵/۱۰هـ.ق ۱۴۰۱/۹/۱۳هـ.ش ۲۰۲۲/۱۲/۴م
د لوړو زده کړو وزارت مطبوعاتي دفتر
