د لينوکس عامل سېسټم د مدیریت ښوونيز ورکشاپ جوړ شو

د لینوکس (  Linux ) سیسټم د مدیریت زده کړه ییز ورکشاپ نن د لوړو زده کړو په وزارت کې د هېواد د۱۹ پوهنتونونو د معلوماتي ټکنالوژۍ کارمندانو ته دایر شو.

د دې ورکشاپ په پرانيسته کې د لوړو زده کړو وزارت مالي او اداري مرستيال نور احمد دروېش د Tein cc دفتر له مرستې څخه چې د دې برنامې لپاره يې کړې وه مننه وکړه او د لینوکس د مدیریت سیستم د عامل موثریت او زده کړه ییز اهمیت په اړه چې د  لوړو زده کړو وزارت د تحصیلي بنسټونو د سرور د امنیت په ساتنه کې رول لري خبرې وکړې او د دې سیستم پر دوامداره استعمال يې ټینګار وکړ.

مالي او اداري معین وویل د دې پروګرام ګډونوال باید پخپلو پوهنتونو کې نورو ته د دې سیستم په زده کړه کې د ښوونکو رول ولوبوي څو د دې ورکشاپ زده کړې په پروسه کې شاملې شي او له معلوماتي ټکنالوژۍ څخه د استفادې فرهنګ چې دا مهال په تحصیلي بنسټونو کې د پرمختګ او کیفیت بنسټ جوړوي، ځای پر ځای شي.

نور احمد درویش زیاته کړه دا مهال د افغانستان د تحقیقي او تحصیلي شبکې سره ۱۴ پوهنتونونه وصل شوي دي او له دې شبکې څخه د غوره ګټه اخستنې طرح ترلاس لاندې ده، چې د  Tein ccدفتر په مرسته به تطبیق شي اود دې شبکې په نښلولو سره به د پوهنتونونو او د اړتیا وړ ټولو ادارو ترمنځ نه یوازې دا چې د یاد سیستم څخه په کار اخيستو اړیکې ځواکمنې شي، بلکې په یوه ښه عایداتي سرچینه هم بدلیدای شي.

هغه  وویل دا مهال ۲۹ پوهنتونونه د نوري فایبر له شبکې سره وصل دي او ۱۴ پوهنتونونه د معلوماتي ټکنالوژۍ له مرکزونو.ICT سره نښلول شوي او په وسایلو سمبال دي.

 مالي او اداري مرستيال وویل د دې  سیستم څخه په اغیزمنه ګټه اخيستنه د څانګو، پوهنځيو، په هیواد کې دننه د پوهنتونونو او د سیمې او نړۍ په کچه د پوهنتونونو تر منځ د نښلېدو امکان پيدا کیږي چې دا ټول مثبت بدلونونه دي او د مسلکي ظرفیت لوړونې لپاره ضروري دي، چې د معلوماتي ټکنالوژۍ د مسوولانو د هڅو له امله دي.

 د ګوهر شاد پوهنتونو ريیس  ډاکټر جواد صالحي هم د علم په پراختیا کې د معلوماتي ټکنالوژۍ د رول په اړه خبرې وکړې او په دې برخه کې غوره مدیریت، د علم د پراختیا، ټولنې او هیواد د پرمختګ لپاره مهم وبلل.

 د لوړو زده کړو وزارت د معلوماتي ټکنالوژۍ مشرې پوهنمل شکریه جمال هم د ټکنالوژۍ او له ټکنالوژۍ څخه په تحصیلي بنسټونو کې د اغیزمنې استفادې په اړه خبرې وکړې او په تحصیلي بنسټونو کې يې ددې برخې له مسوولانو څخه وغوښتل څو په دې برخه کې هڅې او په  دوامداره بڼه د مسلکي ظرفیت لوړولو لپاره هلې ځلې وکړي.

 د لینوکس عامل سیستم  د استاد محمد مصطفی نایر په وینا، دغه برنامه به پنځه ورځې دوام وکړي او په هغې کې به ۳۰ لکچر تدریس شي چې په عملي کارونو به مخته لاړ شي.