د لوړو زده کړو سرپرست وزیر له افغان نړیوال پوهنتون څخه د لیدنې پر مهال، د دغه پوهنتون مسؤلینو ته د کارونو د چټکتیا او د پوهنتون د رسمي پیل په برخه کې لازمې سپارښتنې وکړې.
د لوړو زده کړو سرپرست وزیر شیخ الحدیث مولوي نداء محمد ندیم صاحب د افغان نړیوال پوهنتون له مشرتابه پلاوي سره په ناسته کې د هغوی د فعالیتونو، پروګرامونو، کاري پلانونو، غوښتنو او ستونزو د اورېدو تر څنګ، د دغه پوهنتون د کارونو پر چټکتیا او رسمي پیل ټینګار وکړ.
د لوړو زده کړو سرپرست وزیر وویل چې له یاد پوهنتون څخه مو د لیدنې موخه د دغه پوهنتون د کارونو چټکتیا او رسمي پیلېدل دي. نوموړي زیاته کړه چې افغان نړیوال پوهنتون د تحصیلي نظام او افغانانو یوه جدي اړتیا ده او دغه پوهنتون کولی شي د مسلکي کادرونو په روزنې سره تر یوې کچې د مسلکي کادرونو له اړخه د هېواد ستونزې حل کړي.
د لوړو زده کړو سرپرست وزیر وویل چې دغه وزارت د خپل توان تر کچې د افغان نړیوال پوهنتون له علمي او څېړنیزو پروګرامونو ملاتړ کوي او د ستونزو په حل کې یې ګام اخلي.
د افغان نړیوال پوهنتون رئیس دوکتور رفیع الله عطاء د لوړو زده کړو سرپرست وزیر له ورتګ څخه مننه وکړه او د دایمي او قراردادي استادانو، لابراتوارونو او اړتیا وړ کتابونو د کمښت، د علمي څېړنو لپاره ځانګړې بودیجه او نور د اړتیا وړ موارد د لوړو زده کړو له سرپرست وزیر سره شریک کړل، چې د نوموړي له لوري د همکارۍ ژمنه ورسره وشوه.
د یادولو وړ ده چې افغان نړیوال پوهنتون د ماسټري او دوکتورا په کچه د هېواد ځوان نسل د روزنې په موخه جوړ شوی، چې اوسمهال د طب، انجنیري، کرنې او شرعیاتو پوهنځي لري.
د یاد پوهنتون د مسؤلینو په وینا؛ په پام کې ده چې د افغان نړیوال پوهنتون درسونه په نېږدې راتلونکې کې پیل شي.
