د لوړو زده کړو سرپرست وزیر د امام ابو حنیفه رحمة الله علیه جامعې د دوره حدیث او حافظانو د ۲۹مې دورې دستاربندۍ په مراسمو کې ګډون وکړ.
په دې مناسبت جوړو شویو مراسمو کې د لوړو زده کړو وزارت سرپرست شیخ الحدیث مولوي نداء محمد ندیم یادو فارغانو ته د فراغت مبارکي وویله او په اسلامي ټولنه او په ځانګړې توګه په افغانستان کې د علماوو او فاضلانو پر مسوولیتونو او مکلفیتونو یې خبرې وکړې.
هغه زیاته کړه: «علماء په هر وخت او هر ځای کې ځینې مکلفیتونه لري. په اوسنیو حالاتو کې چې د دین او ولس دښمنان له هرې خوا د افغانستان پر ضد دسیسې جوړوي، علماء کرام دنده لري چې له خپل هېواد، دین، عقایدو او ملي ارزښتونو څخه دفاع وکړي او ولس ته سمه لاره وښيي.»
د لوړو زده کړو وزارت سرپرست همداراز وویل چې د افغانستان اسلامي امارت د ساینسي او علمي مرکزونو پیاوړتیا ته ژمن دی او د مدرسو او پوهنتونونو د چارو د تنظیم لپاره پلانونه لري چې ګام په ګام به عملي شي. هغه زیاته کړه چې په راتلونکي کې به فاضلانو، مفتیانو او طلبا کرامو ته چې په کومه څانګه کې یې زده کړې کړي وي؛ له ازموينې وروسته علمي اسناد ورکول کېږي.
دغه راز په دې مراسمو کې د ملي دفاع وزارت لوى درستيز قاري فصيح الدين فطرت هم د ازادۍ په لاره کې د علماوو پر رول او خلکو ته د سمې لارې ښوولو په اړه خبرې وکړې او ويې ويل، چې په افغانستان کې د اسلامي امارت له واکمنۍ وروسته د هېواد په هر ګوټ کې علماوو او دیني مدارسو ته پاملرنه شوې ده او د دستاربندۍ محفلونه جوړیږي چې دا د افغانانو د جهاد پایله ده.
دغه راز په دې غونډه کې نورو ويناوالو د علم او پوهې په فضيلت، د نړۍ د مسلمانانو د يووالي په اړه خبرې وکړې او د هېواد ځوانان يې د ديني او معاصرو علومو زده کړې او ترلاسه کولو ته وهڅول.
د يادونې وړ ده چې له امام ابو حنیفه رحمة الله علیه جامعې څخه د دوره حدیث او حافظانو د ۲۹مې دورې دستاربندۍ کې ۱۴۰ تنه فارغ او ټولنې ته وړاندې شول.
