د لوړو زده کړو سرپرست وزير د کندهار پوهنتون له رهبرۍ او استادانو سره ناسته وکړه.
په یاده ناسته کې د لوړو زده کړو سرپرست وزیر شیخ الحدیث مولوي نداء محمد ندیم وویل چې موږ خپل ټول امکانات تاسو ته په اختیار کې درکړي، له تاسو مو هیله ده چې د ځوان نسل د روزنې په برخه کې ډېره هڅه او کار وکړئ. سرپرست وزیر زیاته کړه؛ اوسنیو معیارونو او اړتیاوو ته په کتو مو تحصیلي نصابونه جوړ کړي او دغه راز مو د محصلانو لپاره د عملي زدهکړو او کاري فرصتونو پیداکولو په موخه له ګڼو سکتوري ادارو سره هوکړه لیکونه لاسلیک کړي دي.
وروسته د کندهار پوهنتون رئیس محمد اکرم شاه عاصم د لوړو زده کړو سرپرست وزیر ته ښه راغلاست ووایه او له هغه یې مننه وکړه، چې د لوړو زدهکړو د پرمختګ په موخه یې اړین ګامونه اخیستي. ښاغلي عاصم وویل چې د کندهار پوهنتون ټول استادان، اداري او خدماتي کارکوونکي د هيواد خدمت او د نظام ټينګښت ته پوره ـ پوره ژمن دي.
په پای کې د پوهنتون رهبرۍ او استادانو خپلې ستونزې او وړانديزونه له سرپرست وزیر سره شریک کړل او د سرپرست وزیر له لورې د ستونزو د حل ډاډ ورکړل شو او په اړونده برخه کې یې لازمې سپارښتنې ورته وکړې.
