د بالمقطع استادانو ګمارنې د طرزالعمل وروستي کولو په موخه ناسته ترسره شوه
د افغانستان اسلامي جمهوري دولت کابیني د ۲۸/۷/۱۳۹۹ نېټې پرېکړې پر بنسټ؛ په دولتي پوهنتونونو کې د بالمقطع استادانو ګمارنې طرزالعمل وروستي کولو په اړه؛ نن د لوړو زده کړو وزارت د علمي مرستیال پوهنمل عبدالتواب بالاکرزي په مشرۍ ناسته جوړه ترسره شوه.
دغه ناسته کې په داسې حال کې چې د کابینې د چارو د انسجام ریاست مرستیال عبدالمالک دستیار، د لوړو زده کړو وزارت اړوند ادارو رییسانو او د مالیې او اقتصاد وزارتونو استازو هم ګډون لاره؛ د یاد طرزالعمل په اړه یې خبرې او اصلاحي وړاندیزونه او نظریات وړاندې کړل.
دغه طرزالعمل د ګمارنې د کړنلارو ټاکلو، مالي موضوعاتو او استادانو د حقوقو او امتیازاتو روڼوالي په موخه برابر شوی دی. د افغانستان د اسلامي جمهوري دولت کابینې د ۲۶/۳/۱۳۹۹ نېټې په ناسته کې د لوړو زده کړو وزارت موظف کړ؛ څو د بالمقطع استادانو ګمارلو په طرزالعمل کار وکړي. دغه طرزالعمل د کابینې د ۲۸/۷/۱۳۹۹ نېټې په ناسته کې تایید شو او د لوړو زده کړو وزارت ته سپارښتنه وشوه، چې یاد طرزالعمل د یوې ناستې په ترڅ کې د مالیې وزارت او نورو اړوندو ادارو په ګډون، د کابینې غړو د نظرونو په پام کې نیولو او بیا غور وروسته؛ تصحیح او اجرا کړي.
د یادونې وړ ده چې د لوړو زده کړو وزارت په روان کال کې وکولای شو، د یاد وزارت په بېلابېلو برخو کې ۵۲ طرزالعملونه جوړ او وروستي کړي.
