د افغانستان ښوونیزو او لوړو زده کړو بنسټنونو پیاوړتیا ملي کنفرانس پای ته ورسېد.
د لوړو زده کړو وزارت له لورې په کابل ښوونې او رزونې پوهنتون کې د هېواد ښوونیزو او لوړو زده کړو بنسټونو د پیاوړتیا دوه ورځنی ملي کنفرانس د تعلیمي او تحصیلي بنسټونو د ښه والي، پیاوړتیا، ننګونو او ستونزو د حل، د پوهنې او لوړو زده کړو وزارتونو تر منځ د همغږۍ او همکارۍ رامنځته کولو په موخه جوړ شوی و، چې پکې د بېلابېلو استادانو له لوري ۲۲ علمي-څېړنیزې مقالې وړاندې شوې، نن پای ته ورسېد.
د یاد کنفرانس د پای په مراسمو کې د لوړو زده کړو وزارت علمي معین دوکتور لطف الله خیرخواه تعلیم او تربیه د نظام له اساسي دندو څخه یوه دنده وبلله او ویې ویل: «پوهنتونونه باید په ملي قضایاوو کې خپل ملي رسالت اداء کړي او له علمي کادرونو او ملي پانګو څخه په پالیسۍ جوړونه کې ګټه واخلي.»
وروسته د پوهنې وزارت د سرچینو او ادارې معین مولوي صبغت الله وصیل وویل: «یاد کنفرانس د تعلیمي او تحصیلي ډګرونو د قوت او ضعف ټکي ذکر کړل، وروسته له دې هڅه کوو چې د دغه کنفرانس پایلې په خپلو پالیسیو کې ځای پر ځای کړو.»
په پای کې د درجه بندۍ پر اساس د مقالو لیکوالو استادانو ته د لوړو زده کړو او پوهنې وزارتونو د مسؤلینو په لاس تندیسونه او ستاینلیکونه ووېشل شول.
