د شیخ زاید پوهنتون په شمالي غونډیو کې د سیلابونو د مخنیوي او د دغه پوهنتون لپاره د اوبو ذخیره کولو په پار د یوه چيکډېم د جوړیدو ډبره کېښودل شوه.
ياد چیکډېم د ۲،۱۷ ميلیونه افغانیو په لګښت د شیخ زايد پوهنتون په شمالي برخه کې رغول کیږي، چې د جوړيدو لګښت یې د خوست شمل خرم سیندیزې حوزې ریاست له خوا ورکول کیږي او د جوړيدو چارې یې د ياسر افغان ساختماني شرکت پر غاړه لري.
په همدې موخه په شیخ زاید پوهنتون کې جوړې شوې غونډه کې د یاد پوهنتون مشرتابه پلاوي، د خوست مرستیال والي، د خوست ولایت د اقتصاد رئیس، د شمل خرم سینديزې حوزې رئیس او یو شمېر استادانو ګډون کړی و.
د شیخ زاید پوهنتون رئیس شیخ الحدیث مسلمين راشد د شمل خورم سينديزې حوزې له مسؤلینو څخه مننه وکړه، چې شیخ زاید پوهنتون ته یې اوليت ورکړ او د چيکډېم چارې یې نن عملاً پیل کړې. ښاغلي راشد زياته کړه چې د يادو چیکډیم په جوړېدو سره به د باران او ځمکې لاندې اوبو په ذخيره کولو کې مهمه ونډه ولري او د هغه سیلابي اوبو چې پخوا به یې د شیخ زاید پوهنتون ځینې برخې زيانمنولې د یاد چیکډېم په جوړېدو سره به یې مخنیوی وشي.
د يادولو وړ ده چې ياد چیکډېم د (۲۸) متره په اوږدوالي، (۵،۷) متره لوړوالي، (۳،۵) متره سور او د (۵۰۰) متره مکعب اوبو په ذخيره کولو سره به د (۵) هکټاره ځمکې د موسمي او سیلابي اوبو څخه د تخريب مخنیوي توان ولري.
