هېواد د استادانو او محصلینو په هڅو او زحمت جوړېدای او له سیالانو سره سیال کېدای شي
هغه مراسم چې په کابل طبي علومو پوهنتون کې د ۱۴۰۳هـ.ش کال ممتازو محصلینو د ستاینې لپاره جوړ شوي وو، د لوړو زده کړو وزارت د محصلانو د خدمتونو او همغږۍ، د اکاډمیکو چارو څارنې او ارزونې او د بهرنیو اړیکو او بورسونو د تنظیم رئیس صاحبانو، د پوهنتون رهبري، استادانو او ممتازو محصلینو پکې ګډون کړی و.
په یاده ستاینغونډه کې د لوړو زده کړو وزارت د محصلانو د خدمتونو او همغږۍ رئیس استاد کلیم الله محمدي په ټولنه کې د محصلینو پر ارزښت او د هېواد په مهمو قضایاوو کې د هغوی پر رول او ارزښت خبرې وکړې او محصلینو ته یې په خطاب کې وویل چې تاسو د هېواد او خپلو خلکو پر وړاندې ستر مسؤلیت لرئ. نوموړي د خپلو خبرو په دوام کې محصلین لا زیاتو زده کړو ته تشویق کړل.
دغه راز د اکاډمیکو چارو څارنې او ارزونې رئیس مولوي احمدالله حماد وویل چې دا هېواد د استادانو او محصلینو په هڅو او زحمت جوړېدای او له سیالانو سره سیال کېدای شي. نوموړي زیاته کړه د ا.ا.ا دې ته متوجه دی چې د تحصیلي نظام د پرمختګ لپاره له اړتیا سره سم امکانات برابر کړي.
وروسته د کابل طبي علومو پوهنتون سرپرست رئیس ډاکټر مفتي اسدالله نجات په طبي علومو کې د اسلامي علماوو کارنامو ته په اشارې سره، محصلین خپلو مسلکي زده کړو ته وهڅول او ورته ویې ویل: «د خپل مسلک موخه د مسلمانانو خدمت وګڼئ او هغه څانګې د تخصص لپاره وټاکئ چې په ټولنه کې ډېره اړتیا ورته لیدل کېږي.»
په یادو مراسمو کې د هر ټولګي له لومړي تر درېیم نومره او د بېلا بېلو برنامو فعالو محصلینو ته ستاینلیکونه ورکړل شول.
نېټه: سه شنبه
۱۴۴۶هـ.ق، د جمادی الاخرة ۱
۱۴۰۳هـ.ش، د لیندۍ ۱۳مه
۲۰۲۴م، د ډسمبر ۳مه
