شیخ الحدیث محترم مولوي نداء محمد ندیم؛ په پوهنتونونو کې فکري، ژبني او مذهبي تعصب ته ځای نشته

یادې څرګندونې د لوړو زده کړو سرپرست وزیر ننګرهار ولایت ته د رسمي سفر پر مهال، د ننګرهار پوهنتون په ورزشي لوبغالي کې یوې سترې جوړې شوې غونډې ته وکړې. 

په یاده غونډه کې د یاد ولایت مرستیال والي، د علماؤ شورای رئیس ، د جهادي مدرسي مهتمم،د ننګرهار پوهنتون او د ننګرهار خصوصي تحصیلي نهادونو مشرتابه پلاوي، استادانو او محصلینو سربېره، د ولایتي ادارې مسؤلینو او علماء کرامو هم ګډون کړی و. 

دغه راز د لوړو زده کړو سرپرست وزیر محترم شیخ الحدیث مولوي نداء محمد ندیم، په دغه غونډه کې له پوهنتونونو څخه د اسلامي نظام پر غوښتنو، د تحصیلي نهادونو پیاوړتیا، د تدریس او زده کړو کیفیت لوړاوي، د علم پر ارزښت او همدارنګه په ټولنه کې د اکاډمیکو اشخاصو پر رول او د دین، نظام او ټولنې پر وړاندې یې پر مسؤلیتونو خبرې وکړې.  

د لوړو زده کړو سرپرست وزیر وویل چې د هېواد په ابادۍ کې د علمي کادرونو له پوهې، وړتیاوو او مهارتونو څخه ګټه اخیستل د اسلامي امارت ستره هیله ده او له دې پرته له هغوی څخه بله تمه نه لرو.

محترم سرپرست وزیر د پوهنتونونو مسؤلینو او استادانو ته سپارښتنه وکړه چې د پوهنتوني چارو معیاري کېدو، عالي درسي میتودونو کارونې، د محصلینو جامع تربیت، څېړنیزو او علمي هڅو پراختیا، د محصلینو تر منځ د وحدت قایمول او د محصلینو د وخت ضایع کېدو مخنیوي ته جدي پاملرنه وکړي. 

د یادونې وړ ده د ننګرهار مرستیال والي مولوي عزیز الله مصطفی، د علماوو شورا رئیس شیخ حضرت جان حنفي او شیخ الحدیث امیر الرحمن نعماني د غونډې نور ویناوال وو، چې د بېلابېلو دیني او علمي موضوعاتو اړوند یې خبرې وکړې.

نېټه: سه شنبه

‍۱۴۴۶هـ.ق د جمادی الاول ۳ مه

۱۴۰۳هـ.ش د عقرب ۱۵ مه

۲۰۲۴ م د نومبر ۵ مه