د لوړو زده کړو وزارت د تضمین کیفیت او اعبتار ورکونې ریاست سرپرست د خپلو لیدنو په دوام کې د هرات ولایت د غالب، آسیا، اشراق، جامي، خواجه عبدالله انصاري او الغیاث لوړو زده کړو موسسو څخه لیدنه وکړه.
۱۴۰۰کال، د مرغومې ۲۸مه
د لوړو زده کړو وزارت د تضمین کیفیت او اعبتار ورکونې ریاست سرپرست د خپلو لیدنو په دوام کې د هرات ولایت د غالب، آسیا، اشراق، جامي، خواجه عبدالله انصاري او الغیاث لوړو زده کړو موسسو څخه لیدنه وکړه.
د لوړو زده کړو وزارت د تضمین کیفیت او اعبتار ورکونې ریاست سرپرست شاکرالله وحیدي، د لوړو زده کړو وزارت د ځانګړي استازي مولوي منت الله اخوندزاده په ملتیا له یادو تحصیلي بنسټونو او د هغوی له مسوولانو سره وکتل.
د تضمین کیفیت او اعتبار ورکونې سرپرست رییس د لوړو زده کړو وزارت د موخو د بیان تر څنګ، د لوړو زده کړو په برخه کې د یادو تحصیلي بنسټونو له پانګونې مننه وکړه او ویې ویل، چې لوړو زده کړو وزارت له خصوصي تحصیلي بنسټونو هر اړخیز ملاتړ کوي.
هغه وویل: «خصوصي تحصیلي بنسټونه باید د زده کړیالانو لپاره د زده کړو د کیفیت ښه کولو په برخه کې ډېره هڅه وکړي، تر څو ټولنې ته یو مسلکي او متخصص قشر وړاندې کړي.»
ښاغلي وحیدي زیاته کړه، چې لوړو زده کړو وزارت په دې هڅه کې دی، چې د روزنیزو سمینارونو، کنفرانسونو او ورکشاپونو له لارې د دولتي او خصوصي تحصیلي بنسټونو د کیفیت کچه لوړه کړي.
په مقابل کې یې د یادو خصوصي تحصیلي بنسټونو مسوولانو د لوړو زده کړو وزارت د مقام له مشرتابه مننه وکړه، د خپلو فعالیتونو په اړه یې معلومات ورکړل او ژمنه یې وکړه، چې د لوړو زده کړو وزارت د مشرتابه مقام له لارښوونو او سپارښتنو او همدارنګه د اسلامي او افغاني ارزښتونو په رڼا کې به د معیاري تحصیلي خدمتونو د وړاندې کولو په برخه کې هېڅ ډول هڅې ونه سپموي.
