د لوړو زده کړو وزارت رهبري شورا ناسته، د دغه وزارت سرپرست وزیر په مشرۍ تر سره شوه.
په پیل کې د لوړو زده کړو سرپرست وزیر شیخ الحدیث مولوي نداء محمد ندیم صاحب د هېواد د تحصیلي ډګر په پرمختګ کې د اسلامي امارت د رهبرۍ او کابینې غړو له ملاتړ او همکاریو څخه مننه وکړه او ویې ویل چې مشرتابه په هېواد کې د تحصیل د کیفیت لوړولو او پرمختګ په برخه کې زموږ ټولې غوښتنې منلې دي.
نوموړي په لوړو زده کړو وزارت کې روانې تحصیلي او زیربنایي چارې ښې و ارزولې او په دې برخه کې یې د رهبري شورا غړو د هڅو ستاینه وکړه او هغوی یې لا زیات خپلو کارونو ته متوجه کړل.
همدارنګه د لوړو زده کړو وزارت رهبري شورا غړو ته د دغه وزارت د دعوت او ارشاد رئیس شیخ شاکرالله وحدت په اصلاحي بیان کې په کارونو کې د ښه نیت او اخلاص پر ارزښت او ګټو خبرې وکړې.
دغه راز د تېرې شورا پرېکړو ته لنډه کتنه وشوه او د شویو کارونو راپور واورېدل شو.
وروسته له اجنډا سره سم د پوهنتونونو د تشکیل معیاري کېدو کمېټې پر راپور، د پوهنتونونو او نورو ادارو تر منځ د هوکړو طرزالعمل جوړولو، د محصلینو له لوري د اسلامي امارت د ادارو لپاره د سیسټمونو جوړولو پر طرحې او د استادانو د ترفیعاتو اړوندو یو شمېر موضوعات بحث او لازمې پرېکړې وشوې.
