د هېواد یو شمېر خصوصي پوهنتونونه د لوړو زده کړو وزارت لخوا وستایل شول
هغه مراسم چې د هېوا د خصوصي پوهنتونونو مسؤلینو سره د همغږۍ او ستاینې په موخه جوړ شوي وو د لوړو زده کړو وزارت سرپرست وزیر محترم شیخ الحدیث مولوي نداء محمد ندیم سربېره د لوړو زده کړو وزارت د مرکزي ریاستونو ځینو رئیسانو د خصوصي تحصیلي نهادونو بنسټګرانو، مشرتابه او استادانو په کې ګډون کړی وو.
د لوړو زده کړو وزارت محترم سرپرست وزیر شیخ الحدیث مولوي نداء محمد ندیم په دغه مراسمو کې د انساني کرامت، اسلامي ارزښتونو او د اسلامي نظام د مسؤلیتونو په اړه خبرې وکړې او ویې ویل چې عالم هغه څوک دی چې د خپلې پوهې د زده کړې لړۍ ته دوام ورکوي. نوموړي زیاته کړه چې موږ باید هڅه وکړو چې دیني او عصري علوم په سمه توګه زده کړو څو خپلو خلکو او هېواد ته خدمت وکړو.
د لوړو زده کړو محترم سرپرست وزیر د هېواد د ځوان نسل د روزنې په برخه کې د خصوصي تحصیلي نهادونو د هڅو او زحمتونو ستاینه وکړه او ویې ویل چې ټول خصوصي تحصیلي نهادونه د ستاینې او قدر وړ دي.
هغه د دې نهادونو مسؤلینو ته په خطاب کې وویل: «په ټولنه کې هېڅ شی د باور څخه ډېر مهم نه دی، هڅه وکړئ چې په خلکو او هېواد کې خپل باور وساتئ.»
لوړو زده کړو وزارت د دعوت او او ارشاد رئیس شیخ شاکرالله وحدت او د علمي چارو د څارنې او ارزونې رئیس مولوي حافظ احمدالله حماد د علم او په هېواد کې د علم د خدمت اهمیت او ارزښت په اړه خبرې وکړې او ویې ویل، چې هر هغه څوک چې په دې هېواد کې په هر سکتور کې خدمت کوي د ستاینې او قدر وړ دی، او تاسو بختور یاست چې خپله سرمایه په هېواد کې د علم پیاوړتیا، پرمختګ او پراختیا لپاره مصرفوئ.
همداراز د خصوصي تحصيلي نهادونو په استازیتوب، استاد احمد جان پوپل خبرې وکړې او ژمنه یې وکړه چې دوی به د امارتي تحصیلي نهادونو تر څنګ د هېواد د تحصیلي سیسټم په خدمت کې هیڅ ډول هڅې ونه سپموي او د پخوا په پرتله به لا ډېر کار وکړي.
د یادونې وړ ده چې په دې غونډه کې د هېواد شپږو خصوصي تحصیلي نهادونو ته د لوړو زده کړو وزارت لخوا په بېلابېلو برخو کې د دوی د فعالیتونو او لاسته راوړنو له امله ستاینلیکونه ورکړل شول او هڅې یې وستایل شوې.
نېټه: چهارشنبه
۱۴۴۶ هـ.ق د شعبان المعظم ۲۰ مه
۱۴۰۳ هـ.ش د کب لومړۍ
۲۰۲۵م د فبروري ۱۹ مه
