د لوړو زده کړو وزیر د غزني تخنیکي پوهنتون اتمې دورې فراغتغونډه کې محصلین د افغانستان ابادۍ کې ونډې اخیستلو ته وهڅول
په هغه غونډه کې، چې د یادو محصلینو د فراغت په موخه په غزني تخنیکي پوهنتون کې جوړه شوې وه، د لوړو زده کړو وزیر سربیره، د چارو ادارې لوی رئیس، د امر با المعروف او نهي عن المنکر وزارت نظامي مرستیال، د مرکزي دارالافتاء غړی مفتي محمد طاهر احمد، د امارتي ادارو یو شمېر استازو، د غزني تخنیکي پوهنتون رهبري پلاوي، استادانو، محصلینو او د فارغو محصلینو د کورنیو غړو ګدون کړی و.
د لوړو زده کړو وزیر محترم شیخ الحدیث مولوي نداء محمد ندیم صاحب د یادو محصلینو له فراغت څخه د خوښۍ څرګندولو تر څنګ؛ هغوی د افغانستان ابادۍ کې وڼدې اخیستلو ته وهڅول.
محترم شیخ صاحب فارغو محصلانو ته په خطاب کې وویل: « نظام تاسو ته ضرورت لري تاسو هڅه وکړئ، چې د خپل مسلک او رشتې مطابق د افغانستان په بیارغونې او پرمختګ کې ونډه واخلئ او له موجوده فرصت څخه ښه استفاده وکړئ.»
هغه زیاته کړه، چې د دې نظام حفاظت ستاسو ځوانانو مکلفیت دی. موږ ټول باید د نظام په هغو چارو کې مرسته وکړو کوم، چې ورته اړتیا وي او نظام ورسره لا غښتلی کېږي.
نوموړي همدارنګه له فارغ شويو محصلانو وغوښتل، چې د افغانستان د دښمنانو دسیسو او بې ځایه تبلیغاتو ته د پام نه کوي او په خپل ملک کې دې پاتې شي، ځکه دا ملک د ټولو کور دی او پر ټولو یو شان حق لري.
همدارنګه په دغه غونډه کې د چارو ادارې لوی رئیس شیخ نورالحق انور په خپلو خبرو کې یادو محصلانو ته د مبارکۍ ویلو ترڅنګ، د محصلانو پر زده کړو، د استاد، نصاب او تحصیلي چاپریال پر اغېزو مفصلې خبرې وکړې.
همدا راز په غونډه کې د امر بالمعروف او نهي عن المنکر وزارت نظامي مرستیال، د غزني ولايت مرستيال والي، د غزني تخنیکي پوهنتون رئیس او يو شمېر نورو علماء کرامو او مشرانو هم د بېلا بېلو موضوعاتو په اړه ارزښتناکې خبرې وکړې.
د یادونې وړه ده چې د غزني تخنيکي پوهنتون له اتمې دورې الکترو میخانیک او جيولوژي او کانونو له پوهنځیو څخه ۱۴۴ تنه انجنیران فارغ او ټولنې ته د خدمت په موخه وړاندې شول.
نیټه: یکشنبه:
۱۴۴۷ هـ.ق د ربیع الاول ۷
۱۴۰۴ هـ.ش د وږي ۹ مه
۲۰۲۵ م د اګست ۳۱ مه
