د لوړو زده کړو وزارت سرپرست د کابل طبي پوهنتون او د دغه پوهنتون د کادري روغتونونو له مسوولانو سره ولیدل
د لوړو زده کړو وزارت سرپرست شېخ عبدالباقي حقاني نن د کابل طبي پوهنتون او د دغه پوهنتون د کادري روغتونونو له مسوولانو سره ولیدل او د فعالیتونو او ستونزو په اړه یې خبرې ورسره وکړې.
شېخ عبدالباقي حقاني د ناروغانو درملنه د خدمت تر څنګ، عبادت وګڼله او ډاکټرانو ته یې په خطاب کې وویل، چې تاسو د ټولنې رښتیني خدمتکاران یاست او موږ په ټول توان ستاسو د هڅو او خدمتونو ملاتړ کوو. هغه زیاته کړه چې زموږ لومړیتوب په خپل هېواد کې د ټولو ناروغانو درملنه ده، چې بهر ته د تګ لپاره اړ نه شي.
شېخ حقاني د ناروغانو د درملنې پر مهال هغوی ته په وخت رسیدګي، ښه چلند او د اسلامي اخلاقو مراعاتول د یوه مسلمان ډاکټر دیني او ملي دنده وبلله او د تدریسي روغتنونونو د ستونزو د هواري ژمنه یې وکړه.
همدارنګه د کابل طبي پوهنتون او د دغه پوهنتون تدریسي روغتونونو مسوولانو د خپلو فعالیتونو په اړه معلومات ورکړل او خپلې ستونزې او وړاندیزونه یې ورسره شریک کړل.
