د لوړو زده کړو سرپرست وزیر کونړ ولایت ته د رسمي سفر په ترڅ کې، په سید جمال الدین افغاني پوهنتون (کونړ) کې څو مهمې پروژې منظورې کړې
د لوړو زده کړو سرپرست وزیر شیخ الحدیث مولوي نداء محمد ندیم کونړ ولایت ته په رسمي سفر کې د یاد پوهنتون څخه د لیدنې تر څنګ، د سیدجمال الدین افغاني پوهنتون د علمي شورا له غړو، د شرعیاتو پوهنځي او اسلامي ثقافت استادانو او محصلینو سره په جلا جلا ناستو کې د هغوی غوښتنې او وړاندیزونه واورېدل.
د لوړو زده کړو سرپرست وزیر په یادو ناستو کې د لوړوزده کړو وزارت وروستیو فعالیتونو او لاسته راوړنو په اړه خبرې وکړې او ویې ویل، چې لوړو زده کړو وزارت به د هېواد د تحصیلي نظام د پیاوړتیا او معیاري کولو په برخه کې هغه څه چې په توان کې لري ونه سپموي.
هغه دغه راز د یاد تحصیلي نهاد له استادانو وغوښتل چې د محصلینو فکري او عقیدوي روزنې ته ځانګړې پاملرنه وکړي او د خپلو بچیانو په شان یې په روزنه کې هڅې وکړي.
د لوړو زده کړو سرپرست وزیر شیخ الحدیث مولوي نداء محمد ندیم همدارنګه د یاد پوهنتون لپاره د فلزي کټارې په واسطه د لیلیې د احاطې، محصلینو لپاره د څښاک اوبو د ذخیرې، شرعیاتو پوهنځي لپاره د ځای مشخص کول او یو شمېر نورې مهمې پروژې منظورې کړې.
د یادونې وړ ده چې د لوړو زده کړو سرپرست وزیر په وزارت کې د خپل مسؤلیت له لومړیو ورځو څخه د مرکزي تحصیلي نهادونو او دیني جامعاتو څخه د لیدنې، څارنې او ستونزو د حل ترڅنګ؛ د هېواد ټولو ولایتونو ته سفرونه کړي او پر مهال یې د هېواد د تحصیلي نهاونو او دیني جامعاتو زیاتره ستونزې هوارې شوي دي.
نېټه: دوشنبه
۱۴۴۶ هـ.ق د جماد الاول ۲ مه
۱۴۰۳ هـ.ش د عقرب ۱۴ مه
۲۰۲۴ م د نومبر ۴ مه
