د لوړو زده کړو سرپرست وزیر په خپل کاري دفتر کې د جینوا کال مؤسسې له عمومي رئیس سره وکتل
د لوړو زده کړو سرپرست وزیر محترم شیخ الحدیث مولوي نداء محمد ندیم د جینوا کال مؤسسې رئیس او ورسره مل پلاوي ته د ښه راغلاست تر څنګ د زده کړو په برخه کې د عامه پوهاوي او استادانو ظرفیت لوړونه کې د یادې مؤسسې له مرستو مننه وکړه.
نوموړي وویل چې د ا.ا.ا پالیسي د سیمي او نړۍ له هېوادونو سره د ښو اړیکو درلودل دي، هغه د جینوا کال مؤسسې له عمومي رئيس څخه وغوښتل چې د افغانستان واقعي تصویر، هغه څه چې په خپلو سترګو یې لیدلي، له خپل هېواد او د نورو مؤسسو له مسؤلینو سره شریک کړي.
دغه راز د جینوا کال مؤسسې عمومي رئیس جان کېلر وویل چې افغانستان د بهرنیانو مرستو ته اړتیا لري. نوموړي زیاته کړه: «په افغانستان کې مې له بېلا بېلو خلکو سره وکتل، هغوی راته وویل چې افغانستان د پرمختګ پر لور روان دی. زه پوهېږم څوک چې په یوه ټولنه کې ژوند کوي او څوک یې چې له بهره ګوري متفاوت دي.»
د جینوا کال مؤسسې رئیس وویل چې د افغانستان په پرمختګ کې همکارۍ ته ژمن یو او زیاته یې کړه چې موږ له ۲۰۱۸م کال څخه راپدېخوا په بېلابېلو برخو کې له اسلامي امارت سره کار کوو. دغه راز نوموړي د خپلو خبرو په دوام کې وویل چې زموږ هېواد سویس خپلواک دی، نو هر هېواد ته پکار ده چې په خپلو پرېکړو کې خپلواک و اوسي او اسلامي امارت ته هم خوښوو چې خپله خپلواکي ولري.
نېټه: پنجشنبه
۱۴۴۶هـ.ق د ربیع الثاني ۲۸ مه
۱۴۰۳هـ.ش د عقرب ۱۰ مه
۲۰۲۴ م د اکتوبر ۳۱ مه
