د کابل ښوونې او رزونې پوهنتون له بېلابېلو پوهنځيو څخه ۴۷۷ تنه محصلین فارغ او ټولنې ته د خدمت په موخه وړاندې شول.
په کابل ښوونې او روزنې پوهنتون کې په همدې مناسبت فراغتغونډه کې د لوړو زده کړو سرپرست وزیر شیخ الحدیث مولوي نداء محمد ندیم فارغ شویو محصلینو او د هغوی کورنیو ته د مبارکۍ تر څنګ، وویل چې ستاسو کورنۍ او نظام تاسو ته د زده کړو زمینه برابره کړې وه او اوس ستاسو مسؤلیت دی چې د خپلې کورنۍ، خلکو او هېواد پر وړاندې خپل مسؤلیت اداء کړئ.
نوموړي له یادو محصلینو وغوښتل: «د دښمنمانو په منفي تبلیغاتو تېر نوځئ، د فکري جګړې پر وړاندې مبارزه وکړئ، په خپل هېواد کې پاتې شئ، ځکه بهر کې مو نه عزت شته او نه هم د خپل مسلک اړوند دندې درکول کېږي.»
همدارنګه د چارو ادارې لوی رئیس شیخ الحدیث نورالحق انور، د ازموينو ملي ادارې د کابل ښوونې او رزونې پوهنتون رئیس شیخ الحدیث مولوي سید بشیر اغا هاشمي او نورو ویناوالو د یادو محصلینو په فراغت خوښي وښوده او هغوی یې د ټولنې د پرمختګ مسلکي کادرونه وبلل.
د یادونې وړ ده چې د غونډې په پای کې د مشرانو له لوري فارغ شویو محصلینو ته تصدیق پاڼې ورکړل شوې.
نېټه: شنبه
۱۴۴۶هـ.ق، د ربیع الال ۱۱مه
۱۴۰۳هـ.ش، د سنبلې ۲۴مه
۲۰۲۴م، د سپټمبر ۱۴مه
