د لوړو زده کړو وزارت مالي او اداري معین په حضور کې د شکر ناروغۍ د مخنیوي لارې چارې او د عامه پوهاوي پروګرام جوړ شو
یاد پروګرام، چې په کابل طبي علومو پوهنتون کې جوړ شوی و، د لوړو زده کړو وزارت مالي او اداري معین مولوي حافظ محمد حامد حسیب د پروګرام له جوړېدو خوښي وښوده او ویې ویل: «د خوښۍ ځای دی چې زموږ هېواد کې د دا ډول ناروغیو د لاملونو، مخنیوي او درملنې په اړه د عامه پوهاوي غونډې جوړې او بحث پرې کېږي.»
هغه د خپلو خبرو پر دوام کې وویل چې اسلام د اعتدال دین دی، که موږ په خپل ژوند کې اعتدال مراعات کړو، متنوع خواړه وخورو او ورزش وکړو، نو د ټولو ناروغیو، په ځانګړي ډول شکر پر وړاندې مقاومت پیداکوو.
د لوړو زده کړو وزارت مالي او اداري معین په خپلو خبرو کې له ځوانانو وغوښتل چې له مصنوعي انرژي ګانو، ډېرو غوړو او سره کړیو خوراکونو له خوړلو څخه ډډه وکړي.
وروسته یو شمېر ډاکټرانو په خپلو پرېزنټېشنونو کې د شکر ناروغۍ د لاملونو، مخنیوي او درملنې په اړه خبرې وکړې او د یادې ناروغۍ په مخنیوي کې یې د سالمو خواړو، فزیکي تمرینونو، د وزن نورمال ساتنه، له تنباکو او سګرټو څخه ځان ساتنه باندې ټينګار وکړ.
د یادونې وړ ده چې د نړۍ په ګوټ ګوټ کې هر کال میلیونونه خلک له شکر ناروغۍ ځوریږي او ډېری یې خپل ژوند له لاسه ورکوي.
نېټه: پنجشنبه
۱۴۴۶هـ.ق، د جمادی الاول ۱۲مه
۱۴۰۳هـ.ش، د عقرب ۲۴مه
۲۰۲۴م، د نومبر ۱۴م
