د لوړو زده کړو وزارت علمي معین په خپل کاري دفتر کې د چاپیریال ساتنې ملي ادارې له مالي او اداري مرستیال سره په ننګرهار پوهنتون کې ترسره کېدونکي د (اقلیم بدلون نړیوال کنفرانس) د څرنګوالي په اړه وکتل.
د اقلیم بدلون چې یو ستر نړیوال ګواښ په توګه بشري ژوند زیانمنوي او ورځ تر بلې یې د ګواښ ګراف په لوړېدو دی، د ننګرهار پوهنتون په پام کې لري، چې د لوړو زده کړو وزارت په همکارۍ د روانې دلوې میاشتې په ۲۱ مه نېټه د اقلیم بدلون په اړه علمي- څېړنیز کنفرانس دایر کړي. یاد کنفرانس کې به د بېلابېلو داخلي او نړیوالو پوهنتونونو استادانو له لوري مختلفې څېړنیزې مقالې وړاندې او د لوړو زده کړو وزارت له لوري به یې پایلې له اړوندو ادارو او وزارتونو سره د ستراتېژیو جوړولو په موخه شریکي شي.
د دغه کنفرانس څرنګوالي په اړه د لوړو زده کړو وزارت علمي معین دوکتور لطف الله خیرخوا په داسې حال کې، چې د ننګرهار پوهنتون د علمي چارو مرستیال هم شتون درلود، د چاپیریال ساتنې ملي ادارې له مالي او اداري مرستیال مولوي عبدالسلام حقاني او مسؤلینو سره وکتل.
په ناسته کې د دواړو لوریو ترمنځ د کنفرانس په څرنګوالي، مدیریت او له کنفرانس څخه وړاندې ترسره کېدونکو لارو چارو په اړه بحث او نظریات شریک شول.
نېټه: ورځ چهارشنبه
۱۴۴۵/۷/۱۹ هـ ق ۱۴۰۲/۱۱/۱۱ هـ ش ۲۰۲۴/۱/۳۱ م
