د هېواد د تحصیلي بنسټونو د انجنیري او کرنې پوهنځيو د فوق الېسانس پروګرامونو د تحصیلي نصاب د بیاکتنې او پراختیا لومړی پړاو کلسټر پیل شو.
د یاد کلسټر په پرانیسته کې د لوړو زده کړو وزارت د محصلانو چارو معین مفتي محمد طاهر احمد وویل چې نصاب د ټولنې په اصلاح او د محصلینو په رزونه کې ستره ونډه لري. نوموړي د نصاب پر ارزښت خبرې وکړې او ویې ویل چې نصاب د هيواد پرمختګ او تعلیمي کچې لوړولو لپاره اساسي او بنیادي شرط دی.
همدارنګه یي وویل، چې الله تعالی دا دنیا او کاینات د ښې استفادې لپاره پیداکړي او موږ د کرنې او انجنیري مسلکونو په وسیله کولی شو، چې ښه استفاده ترې وکړو. نوموړي د هېواد خپلواکۍ ته په اشارې سره يې له استادانو وغوښتل چې په ازاد چاپېریال کې بحثونه وکړي او په تحصیلي نصاب کې ملي او اسلامي ارزښتونه مراعات کړي.
وروسته د لوړو زده کړو وزارت د تحصیلي نصاب رئیس مفتي عبدالرؤف فراهي وویل چې د هېواد او ټولنې پرمختګ په تعلیم او تحصیل او د تعلیم او تحصیل پرمختګ او معیاري کېدل په نصاب پورې تړلي دي.
د یادولو وړ ده چې په دغه کلسټر کې به د انجنیري او کرنې پوهنځيو د فوق الېسانس پروګرامونو پر ۲۲ څانګو، د پنځو کاري ورځو په جریان کې کار وشي.
