د لوړو زده کړو سرپرست وزیر په کابل پولي تخنیک پوهنتون کې د ۱۲۹ میلیونه افغانیو په ارزښت ۲۲ بېلا بېلې پروژې پرانیستې.
په کابل پولي تخنیک پوهنتون کې په همدې مناسبت جوړه شوې غونډه کې د لوړو زده کړو سرپرست وزیر شیخ الحدیث مولوي نداء محمد ندیم، په داسې حال کې چې د دغه وزارت معین صاحبانو، د مرکزي پوهنتونونو رئیسانو، استادانو او محصلینو هم حضور درلود، د یادو پروژو په پرانیسته خوښي وښوده.
د لوړو زده کړو سرپرست وزیر مخکنیو امنیتي ستونزو او د تېرې ادارې د حکامو ظلم ته په اشارې سره وویل: «له فتحې مخکې د افغانستان خلک د نا امنۍ او د اشغالګرانو له ظلمونو څخه د ډېرو ستونزو شاهدان وو او هر سهار به یې د کورنۍ د غړو په شهادت او زنداني کولو سره پیل کاوه، چې له نېکه مرغه اوسمهال د هېواد په کچه د لویو پروژو د پرانیستې شاهدان دي.»
نوموړي د تحصیلي نظام د پیاوړتیا په اړه وویل چې د ا.ا.ا مشرتابه همېشه د دغه وزارت له علمي او زېربنایي پروژو څخه ملاتړ کړی او په عمل کې یې ثابت کړی دی.
همدارنګه د لوړو زده کړو سرپرست وزیر له استادانو او محصلینو وغوښتل چې د ډلو او جریانونو د منفي تبلیغاتو تر اغېزې لاندې رانشي او د علم پر زده کړه تمرکز وکړي.
وروسته د لوړو زده کړو وزارت مالي او اداري معین مولوي حافظ محمد حامد حسیب د کابل پولي تخنیک پوهنتون د ۲۲ پروژو پرانیسته، د دغه پوهنتون د اړتیاوو په پوره کولو او ستونزو حل کې ګټورې وبللې او له استادانو او محصلینو یې وغوښتل چې له شته امنیت او خپلواکۍ څخه په استفادې د هېواد په پرمختګ، ابادۍ او د علم په تولید کې هڅه وکړي.
دغه راز د کابل پولي تخنیک پوهنتون سرپرست رئیس انجنیر سردار ولي صالحي د یادو پروژو د تمویل له کبله د لوړو زده کړو وزارت له رهبرۍ څخه مننه وکړه او ویې ویل چې په دغو پروژو کې د ودانیو ترمیم او بیاجوړونه، د لابراتوارونو او دفترونو تجهیز،د لیلیې محصلینو د البسې تدارک، د خوړنځای تجهیز او د یاد پوهنتون د ۸ پوهنځيو د اړتیا وړ کتابونو تهیه او تدارک شامل دي.
د یادونې وړ ده چې د کابل پولي تخنیک پوهنتون د هېواد له سترو پوهنتونونو څخه دی، چې په انجنیري څانګو کې فعالیت کوي او هر کال سلګونه انجنیران ټولنې ته وړاندې کوي.
نېټه: پنجشنبه
۱۴۴۶هـ.ق، د ربیع الاول ۳۰مه
۱۴۰۳هـ.ش، د میزان ۱۲مه
۲۰۲۴م، د اکتوبر ۳مه
