د لوړو زده کړو سرپرست وزیر په حضور کې د کابل ښوونې او روزنې پوهنتون له استادانو سره اصلاحي ـ علمي غونډه وشوه
په کابل ښوونه او روزنه پوهنتون کې په همدې مناسبت غونډه کې د لوړو زده کړو وزارت د دعوت او ارشاد رئیس، د کابل علماوو شورا رئیس، د کابل ښوونې او روزنې پوهنتون مشرتابه پلاوي او استادانو ګډون کړی و.
د لوړو زده کړو سرپرست وزیر محترم شیخ الحدیث مولوي نداء محمد ندیم په یاده غونډه کې استادانو ته وویل چې تاسو د ټولنې مهم خلک یاست، د هېواد ابادول ستاسو مسؤلیت دی. هغه زیاته کړه: «هغه خلک چې علم لري، په دنیا او اخرت کې به بریالي او سرلوړي وي.»
نوموړي استادانو ته سپارښتنه وکړه چې خپلو مسؤلیتونو ته متوجه شي، د دیني او عصري علومو تر منځ واټن ختم او خپل ځان له نبوي سنتو سره برابر کړي. هغه له استادانو وغوښتل چې د محصلینو سالمه فکري روزنه وکړي او ټولنې ته متعهد او بااستعداده بشري ځواک وړاندې کړي.
وروسته د کابل علماوو شورا رئیس شیخ الحدیث خلیفه صاحب دین محمد، د لوړو زده کړو وزارت د دعوت او ارشاد رئیس شیخ شاکرالله وحدت او د کابل ښوونې او روزنې پوهنتون رئیس شیخ الحدیث سید بشیرآغا هاشمي د علم پر ارزښت او د جهل له منځه وړلو، د اسلامي علماوو تاریخ او د استاد پر مسؤلیتونو خبرې کړې.
نېټه: پنجشنبه
۱۴۴۶هـ.ق د ربیع الثاني ۲۸ مه
۱۴۰۳هـ.ش د عقرب ۱۰ مه
۲۰۲۴ م د اکتوبر ۳۱ مه
